(1) Leidaw khua sat teng
1955 kum in Pu Son Ngul lampui nataw in Pu Sing Pum, Pi Mang Dim leh Pi Lian Dim te in, inn sa uh a, Leidaw khua thak sat uh hi.
(2) Om na mun
Leidaw khua in, Myanmar, Chin State, Tedim township sungah om hi. Tedim ngam le Falam ngam kilaklaw ngamngi lian ah khua ki sat hi. Nisua na sangah Voklaak khua om a, ni tumh nasang sia Falam ngam hi a, Falam township Kealkong le Situi khua te om hi. Leilu sang ah Limkhai Zongal khua om a, Leitaw sanngah Falm township Sialsih khua om hi. Elevation (tuipi maipan asan na) pi 6500’ pha hi.
(3) Leidaw khua min
Tedim ngam le Falam ngam kikawn na ngamngi santak ahi bang ma in, nidang hun lai in Falam mi te le Sizaang mite ki sik tua na mun, van le van kithe na sum le paai taw van kilei na mun ahi kom, “Leidawl” namun nana ci uh hi.
Pu Son ngul ii khuathak hongs ah hun tak ciang in Leidaw min ma lakik in Leidaw khua ci-in, khua min tu in na akip sak hi.
(4) Khua hun
Leidaw khua sia mualdawn ah aki sat khua nuam mama khua khat a hi hi. Hui vot te vahva hiau in khuasik vahiau tawntung hi, Khuakhal hun sung hui tam hi. Khuakhal hun sung hui tam hi. Phalbi hun ciang tui khalh tawntung hi. Apple piang hi. Apple taw ki sai ih Zo-ngam buppi ii maipha ngana ngam le lei a hi hi. Kawlngam sung mun tatuam atu in Apple Centre khat zongh a hi hi. Apple tung tawn in Topa Pathian in thupha pialai hi.
(5) Tuineak
Mualdawn ah akisat khua ahi kom tuineak tu hamsa hi. Leidaw khua ii anuai sang falung nihna khawng ah tui om a, um le beal taw in tui tawi tawm ki ne hi. 1957 kum ciang in taaktuidot taw tui pai thei na ciang dong tui kila in tui kuang khat kikoih hi, Falung khat bang tuitawi na nuamtuam hi. 1990 zawk ciang U Kim Lai thu thiam nataw Leidaw khua le tui atu in Kumlu mual pan in tui hong laksak a, Leidaw Tuiphum biakinn kong santak ah tuibeam / tuikhol na khat vawt sak in, Leidaw khua sungah tui neak anuam in ki zangh thei hi. 1999-2000 hun ciang UNDP pan in kumlu tui ma aki cing zaw lai in laksak / zop sak in Leidaw khua sungah Tapstand mun Sali koi sak in tuineak na tuidawn na tui zak k icing in nuam ma ma hi.
(6) Motor Car Lam
1950 kumin SSNP Sizaang, Ngawn kipawl khop na Motor car lampi zik na tung tawn in Leidaw pan in tailii leh falung thum akhua la na, Kalaymyo le Falam lampi tung Zawngkong camp pan in lampi ki vawt hi. Siphu vanpua nih akipial thei vahet tu in lampi vawt uh hi. 1960 kum in Leidaw Camp ah Mawtaw theng thei hi.
SSNP kipawl khop na tung tawn in Leidaw khua, khua laizang ah Bawlung poai akhat vein a kivawt phit hi. Hi hun pan kipan kum khat in khat vei veu Bawlung kidem na nei kawm in Mawtaw lampui atu meeting lian mama khat taw veu in ki vawtkhawm hi.
(7) Biak Na
Tuiphum, AG, UPC, RC Laipian om hi. Tuiphum pawlpi sia 2001 March 4 ni-in pawlpi tuam in din na SRBA in kipsak na le Topa tungah apna nei sak hi. Church Pastor Sm. Dim Hau Cing a hi hi. Limkhai Zongal pawlpi pan in inn tuan hi.
AG pawlpi zongh 2004 kum pan in pawlpi tuam in ding uh hi. Limkhai Zongal pan ma in inntuan hi. Church Pastor Sya Suak Khaw Hau a hi hi.
Adang pawlpi te sia Limkhai Zongal ah kipawl hi.
(8) Lai sin sang
1990 kum in BEPS kumpi te in phut hi.
Head Master seam ngei teng
(1) Sya Khai Za Pau (Keihzaang)
(2) Sya Lian Khan Sum (Mualbeam)
(3) Sm. Daw Ngin Man Neam (Voklaak) le
(4) Sya Cin Lian Mung (Tongsial) teng hi.
Pa En Khan Nang le Pa Sing Za Dal te in Sya Quarter inn lim ci mama khat Thikkang hong sik in 24’ x 18’ in ki sa hi.
(9) Hydro Electric
Tuiphum pawlpi te hanciam na taw in September 30, 2002 ni-in Electric mei ki de hi. AG pawlpi te han ciam nataw in 2002 kum sung ma in Electric mei de hi. Pawlpi sung bek hi ngawl in pawl dang pan in zongh mei atulmaw theampo mei pia siat uh hi. Tuni Leidaw khua ah inn aom papo inn (85) pha a, ateang tatak sia inn (55) pha uh hi. Mihing (350) pha uh hi. Tedim le Falam ngamngi ahi kom, Falam mi zong tam ma teang uh hi.
Source: Christian Centenary Jubilee Magazine By B Thang pui & Magazine Laiatpa
Limkhai Innkuan pan copy hi.
0 comments:
Post a Comment