Obama in University of Yangon ah a Thugen (Zokam)

Lungdam ing. Tuni in USA President lak pan Kawlgam a hawh masa pen ka hih angtang ing. Hih mun ah thugenna ka neih theih zong hampha kisa ing. Na gam uh kiphamawh ka hih manun kong pai hi. East leh South Asia kikal ah om in, leitunga mihing tamna gamte tawh gamgi na zawng uh hi. Na gam un leitunga gam khangto pente mailam thu tampi kisaipih kha ahih manin note kong kitheihmawhbawl thei kei uh hi.

Na gam uh minam tuamtuam tenna ahih manin kilawm in paktathuai hi. Tuni in Shwedagon ka hawh a, kum tampi sung hih gam leh i tenna leitung pen itna leh kitelsiamna tawh i tenna gam hi cih lim leh mel lak ahih manin thupi kasa hi. Hih khuapi pan Himalaya mualpi dongah khua tul sawmguk val dongah kizopna nei in, Karen gammang lak leh Irrawaddy luipi dong huam hi.

Hih pilna sang sinna sanginnpi zahtakna lianpi ka nei hi. Hih sanginnpi pan in gamkek mikangte deihlohna kipan hi. Hih sanginnpi pan in Aung San in thukizakna tampi na hawmkhia masa a, tua zawh ciangin gam suahtakna dingin nasep hong kipan hi. Hih sanginnpi pan in U Thant in leitung paizia na sinin tua a pilna sinte tawh UN dong hong makaih hi. Hih mun ah pilna sinna dingin sum tampi kibua in sangnaupangte in a suahtakna uh limci takin a zang ngei uh hi. Tu in zong na kumpi vaihawmna Parliament uh thupukna bangin hih sanginnpi (university of Yangon) in tha lakik in a thupina luite khempeuh a ngahkik theihna dingin a hanciam kik kisam hi; banghang hiam cih leh hih gam mailam leh a thupina ding hih sanginnpi leh a sunga sangkah sangnaupangte khut ah kinga hi.

Ei gam nih kikal ah thuhoih tampi piang khin hi. Kum za val paisa hun in America pan sumbawl, Pasian nasemte zong i kizopna ding zongin hong pai khin ngei uh hi. Galpi Nihna hun in zong hih gam pan ka galkapte uh leh ka vanlenghawlte uh tampi China gam ah lut in gam adingin a nuntakna uh na pia khin uh hi. I gam nih in British ukna pan a suakta i hi a, koh gam in Kawlgam pen gam thak a suak in a lungdampih masa pawl ka hi uh hi. Rangoon khuapi sungah America Zumpi ka neihna ding uh nong piak man un ka lung uh dam a, kizopna a kipsak ding sanginn hih bang nong phalsak manun zong ka angtang uh hi. Ngaihsutna kibanglo in hun sawtpi i om hangin hih gam itna leh a mite itna ah i ngaihsutna a kipelh ngei kei hi.

Tua khempeuh sanga thupizaw pen America in mihing mihinna leh a suahtakna thupisak penpen uh hi cih ka gen nuam hi. Kum tampi sung i lampi tot kibanglo hi. Ngaihsutna kidang hi. Ahi zongin tuni in hih gam in mailam lametna lianpi nei in kalsuan hi cih ka lamen uh a, mipite hangsanna leh deihna kong theihpih uh hi.

Gam leh nam hanga thongkiate puankang silh a Nipini sima hawhte thupi kong sa a, phungzi te in nawngkaina omlo a na deihna uh laka lampi na zuihte uh thupi kong sa uh hi. Huihpi nun lai haksatna thuakte huh dingin mipi kipawlkhawm in na panpih uh zong kong mu uh hi. Sangnaupangte deih ngetna kikona awte ka za uh a, lasiamte suahtakna deihna lasakte zong ka za uh hi. Gamdangah a taikhiate in na gam leh na minam uh tawh kizopna tatsaklo a na omte uh zong ka thei uh hi. Aungsan Suu Kyi hangsanna in tha hong pia in, mihing khat in lametna lianpi tawh nungta peuh leh a lungsim leh a ngaihsutna kikhumcip theilo hi cih hong musak hi.

US President ka suak ni in leitung gam kumpi lauhna tawh a vaihawmte khempeuh kiangah ka thugen pen, "Na lauhna uh na beisak nop vua, suakta taka kumpi na sepnop uh leh kong huh ding uh hi," cih hi. Tua hangin tuma kum khat leh a lang sungin kum 50 val ukcipna tawh a kiuk gam sungah kikhelna hong piang hi. President Thein Sein kumpi sepna nuai ah kikhekna a deih lak ah bawlphatna, bawlhoihna kihel hi. Mipi teelte in vaihawm in kumpi vaihawmna Parliament ah thu kikumta uh hi. Hun khat laia kipampaih NLD te zong kitelna ah kihelsak in Suu Kyi zong Parliament Member a suakta hi. Thongkia tampi kikhah in, zawhthawhthu tawh van puakna (porter puakna) kibeisak a, gamsung thau tawite tawh kilemna bawl in nekzonna leh gam khantohna ding deihna tawh vai kineita hi.

Tuni in ka ciamsa kilawmtatna leh suahtakna a bawl dingin kong pai hi. USA in tangmi khat Rangoon ah koih zo a, sum tawh huhna te kikhakcip nawnlo in, gam leh mipi khantohna dingin zong kong huh sawm lai uh hi. Ahi zongin tua kikhelna ding pen a kipanpan hi a, lampi sau mahmah lai hi. Kumpi vaihawmna in mipi nautang tungah hoihna a piangsak ding ka deih uh hi. Kikhelna neucik ka muh pen a bei ding ka deih kei uh hi. Thakhauh in a mainawt ding ka deih uh a, tua pen America mipi leh ken zong kong deihpih hi.

Gam tuam tuak i hih hangin i lunggulh kibang hi - eima kumpi ei mipi teel hiding, kilem kiit in tengkhawm ding, pilna siamna sin dingin zang ding, i gam leh i minam it dingin suakta taka nungta khawm ding. Tua manin suahtakna pen a kimu theilo lametna hilo in a kimu they, a kizang thei kalsuanna ahi hi. Kitelna bek ah a kizang hilo in nisim nuntakna ah a kizang ding nam ahi hi. USA President lui Roosevelt in tua thu na tellua ahih manin hih bangin na gen hi: America suahtakna pen kitelna bek hilo hi. Democracy cih zong kitelna om cianga vote khiat bek hilo hi. Suahtakna namli kisam hi - kampau, biakna, duh leh deih zon theihna, lauhna pan suahtakna. Hih lite suangthu bangin kitawi uh a, khat omlo in a dangte a ding thei kei hi.

Tua pen ko gam ah ka neih uh hi a, mi khempeuh in a neih ding uh ka deihsak uh hi. Tua thu tuni a ka gennop pen ahi hi.

Khatna ah, mipi in a deih a lunggulh uh a om leh suakta taka genkhia in kumpi in bil na dawh dinga, kumpi in a kisam bangin na ngaihsutpih ding hi. USA in kum za nih bang ka mipite ading ka hihkhin uh hi. Sila suahtaksakna, numeite in vote khiat theihna, nasem mite kipawlna cihte ka neisakta uh hi. Gamdang nih in zong hong etteh uh a, mipi deihna tawh kalsuanna ah gam khantohna hat mahmah hi cih ka tel uh hi. Mipi te ukcip sangin suakta taka kipawlkhawm phalna ah thuhoih piangzaw hi. Thukizaknate khakcip sangin khahkhia in hong leng mite ngaihsutna kitelzaw hi. Politics ah pawl tuamtuamte daangkoih sangin kipawlpih in semkhawm leng kimainawt zaw hi. Na pu na pa khang vua na ngak uh tuni in a mu na hita uh hi. Suahtakna a ciamkha na hita uh hi.

Mipi suahtakna i zahtaksak theihna dingin kumpi vaihawmna ah thuneihna khempeuh i neihlohna i telsiam ding ahi hi. USA zong tuabang ka hi uh hi. Ko gam ah leitunga galkap hat pen ka neih uh hangin mipi teel vaihawmte thuneihna ah ka thuneihna lianpen uh om hi. Kei President in tua mipi teelte thuneihna pen diktak, maantak in a kizang hiam cih a enkai ka hi a, mipi teel te in kei hong enkaai hilozaw hi.

A langkhat pan gen leng - kei President deihna pen mipi teel vaihawmna phual Congree ah ka zang sukgawp thei kei hi. Tam veipi kei deihna bangbangin vaihawmpih ziauziau thei leng ka ut hi; ahi zongin hitheilo hi. Mipi teel vaihawmte in thuneihna lianpi nei uh a, kei thuneihna zong a dik in a kizang hiam cih hong zeek uh hi. Ka deih ka gen thei a, ka deih bangin ka hih khinsak thei kei hi. Ahang pen Kumpi Kiukna Laibupi sungah kei zong mawhpuakna ka nei hi. Noh zong kiukna laibupi thuneihna (constitutions) pen mi khat thuneihna sangin tungnungzaw in na koih theih hun ding uh na mitsuan uh hunta hi. Pasal a piang peuh galkap lutsak ding, numei peuhmah nuaisiah ding cih bang ngaihsutna a bei hunta hi. A thanem leh a hatlote kiukna laibupi sunga thukhun in a kep a huai kisam hi. Galkap khempeuh in zong tua laibupi thukhun zuiin a gamtat uh hoih dinga, mipi teel vaihawmte bek in tua galkapte tungah thuneihna zong a neih uh hoih ding hi.

Tua bang lam manawh a i kalsuanna ah America in hong tonpih dinga, hong huh ding hi ung. Hun beisa ah mipi deihna tawh a kiteel mipi vaihawmna kumpi in mipi adingin nopna leh suahtakna leh khantohna piangsak pen hi cih i tel hi. Tua bang dingin a pangkhawm nuam ihi hi. Mipi in a deihna uh a gen uh ciangin kitheihmawhbawl theih a hi kei hi. Kikhelna khat peuh in mipi adingin khantohna leh mainawtna a kidawksak ding ahi hi. Na pil na siamna khempeuh uh na zat uh ciang gam leh minam in hamphatna ngah ding hi. USA in sumbawlna tawh kisai kizopna a khaktan khempeuh khahkolta a, mipi hamphatna dingin sum leh pai ah kizopna i nei kikta ding uh hi. A lian a lal teng bek hamphatna a hih ding ka deih kei a, mipi khempeuh hamphatna ahih ding ka deih hi. Mipi khempeuh in a gah ne ding, a semzo, a zong zo zaw peuhmah in tam ngah ding, nasep hanciam ding cih ka deihna uh hi.

Tua bang ahih theihna dingin golhguk nekna (corruption) a bei kisam hi. Mipi hamphatna a om theihna dingin vaihawmna leh sumbawlna khempeuh ah guktat omlo in a kilangsuak nasepna ahih ding kisam hi. USA pan sumbawlna a nei nuamte adingin a sumbawl dan uh a kiselsim, a kitheilo omlo in a kitel sitset in siangtho taka a sep ding uh ka phal bek ding uh hi. Tua bang mite bek ka semsak ding uh hi. World Bank pan huhna kong zonpih ding uh a, mimal sumbawl nuamte zong kong pattah ding uh hi. Na kumpi un suakta taka kizopna a bawl sawm ka thupisim uh a, sumzatna ah mawh a puak ngam uh ka deih hi.

Tua khempeuh sangin kumpi in na deihna uh hong theihpih in note deihna leh lunggulhte hong sepsak leh ka deihpen hi. Tua hileh nek ding dawn ding neilote, meivak nei nailote, cina damlote, gilkial dangtakte a nuntakna uh man nei pan ding hi. Tua dingin USAID pan in huhna kong pia ding uh hi.

Hih gam ah hauhna tampi om a, leisung sum piang tam mahmah hi. Ahi zongin a hau a liante bek in a meet a nek ding uh kilawmlo hi. Hih gam pen a gammi khempeuh ading hi a, a gam hauhna lianpen zong mipite ahi hi. Gam khanna taktak pen mi khempeuh thahatna guatna pan hong piang ding hibek hi. Tua manin khangnote in pilna siamna a neih uh kisam hi. America zong a khanna leh a thahatna khat pen pilna siamna sinna pan ahi hi. Hih gam sangnaupangte koh gam ah hong pai in pilna hong la le uh ka deih uh a, koh gam sangnaupangte zong noh gam ah hong hawh in pilna hong zong le uh ka deih hi.

Ka gennop lai khat pen suakta taka biakpiakna thu ahi hi. Kizahtak taka biakna piak ding ka deih hi. Minam tampi omna gam hi a, mel leh puam kibanglo hi. I suah i khanna kibanglo a, i biakpiak dan zong kibanglo hi. Biakna tau tuamtuam om a, minam 100 val om hi. Ahi zongin gamsung galguk nei tawntung gam na hi uh hi. Tampi sihlawh a, innkuan kisia in minam kimudah a, khantohna ziakaisak hi.

Gam khantohna pen kilemna omlo in a piang ding hilo hi. Kachin Gam leh a dangah kilemna bucing a om kei leh khantohna nawngkaisak ding hi. Kilemna bucing ah a puapial khinsate nangawn a gam ah a ciahkik theih ding a kisam hi. A deih a lunggulh uh a neih theih ding uh kisam a, a zon theih ding uh kisam hi. Hun sawtpi kisam ding nam hi a, ahi zongin a kipatna a om kul hi. Rohingia te thuakna zong ka za uh hi. Kumpite in thudikna, thumaanna a hanciamna thakte uh ka pakta a, thupi kasa hi. A matut dong uh a sep ding uh a thupi pen hilai ding hi. Tua dingin leitung in hong mitsuanta hi.

Gammi hihna pen a thupi leh a genhak mahmah khat hi. USA ah zong ka buaipih khat uh hi. Ahi zongin ka zuih uh khat pen - mi kua peuh in suakta taka a nuntakna a nuntak theihna gam i neih ding a thupi hi ka ci uh hi. Gam tuamtuam pan pai, biakna tuamtuam nei hi ung. Kam tuamtuam a paute ka thuneu koih tuankei uh hi. Tua in ka gam uh a hihna a hisak hi. Tua in ka gam uh thahatsak a, thakhauhsak hi. Tuni in leitunga gam thupi pen kumpi in kong dinga, hun khat lai hileh kei pen ka vun hangin kumpi a suak theilo dingpa ka hi hi. Ka kiukna uh ka laih uh a, ka bawlpha uh a, tua hangin tuni i kimu thei hi. No zong tua lam na manawh ding uh kong deihsak hi. Thanemna hilo in thahatna lampi a tawn na hizaw ding uh hi.

A tawpna pen ah, mikhempeuh suakta taka a nuntak ding ka deih hi (freedom from fear). I nuntakna ah i lunggulh i tunna ding lampi hong dal khat pen lauhna a hi den hi. Gal kido ding launa, mailam thusia piang ding lauhna, sum leh pai zonna a kisiatcip ding lauhna, minam leh ngeina a beimang ding launa, cih bangin a tuamtuam om hi.

Minam tuamtuam mun tuamtuam pan paikhawm ihi uh hi. Suu Kyi a thongkiat sungin Lauhna pan Suahtakna cih thu a gelh a, "Thuneihna khahsuah ding lauhna in thuneihna lente lungsim patausak a, thuneite bawlsiat ding lauhna hangin thuneilote lungsim ah patauhna guan hi," a ci hi. Tua patauhnate na nungngatsanta ding uh hi; banghang hiam cih leh na makaite uh leh kumpite in tua nungngatsan dingin vaithak a neita uh hi. Suu Kyi mah in, "Lauhna leh patauhna pen a khangto minamte nuntakna ah kihello hi," na ci hi. Tuni in hih gam ah patauhna leh lauhna tawh nuntakna pen a om tawntungin na deihlohlam uh leitung in ka mu uh hi.

Tua thute hangin kei hih mun ah tuni hong ding ka hi hi. Tuni in tua manin Rangoon hong zin ka hi hi. Hih mun ah thupiangte thupi in manpha peuhmah hi - note ading bek hilo, leitung bup adingin. Minam leh gam tampi etteh ding kalsuanna tuni in kipanpah ahih manin. Hih gam in tua a tup a sawmna a tung ding hiam cih a kisinna tuni hipah hi.

America pen Pacific tuipi tawh kisawhkha gam khat hi a, tua manin tuni in ASEAN thu tawh kisai in a kisam banga panla dingin ka hanciam hi. Ka naupanglai in Indonesia ah ka om ngei hi. ASEAN gamte pen khangto in mainawt a, kilemna leh kilawmtatna uangbawl semsem in mihing suahtakna leh gam khantohna zong a hahkat semsem uh hi. Tua pen tuhun i paizia ding mah ahi hi.

Tuni in hih mun pan thu ka pulaknop khat om hi - i hun luite hangin i kidahsak, kikhasiatsak ding hilo hi. Mailam en in kalsuan zaw ding hihang. N.Korea zong nuclear nusia in khantoh lam manawh dingin ka deihsak hi, tua hileh USA in hong huh in hong pan dingin a kimansa ka hi uh hi.

Kum 2012 i tun ciangin kuamah nisuah, nitum, leilu, leitaw ciin i kikhen kul nawnlo hi. China leh India khantohna i pakta hi. UNO in leitung gam khempeuh deidan neilo in kilemna ding leh khantohna dingin a semkhawm nuam hi. USA zong koi peuh in mimal suahtakna leh a gam mite suahtakna deihsak a leitung gam thukhunte a zahtakte tawh a semkhawm den nuam ahi hi.

Tua bang gam leh leitung hih mun panin i bawl pan thei hi. Mi khempeuh hamphatna ding sep i kipat ding ahi hi. Thongkia ngei khat in, "Politics pen note sep ding hi. Politicians te bek sep ding hikei," na ci hi. USA ah kumpi office thupi pen citizen office hi a, President office hizenzen lo hi.

Haksatna tampi om in a thanem huai mahmah hun a om hangin gam leh nam khantohna ding nasep tawpsan ngei kei un. No a gammite mah hih gam mailam kalsuanzia a gel ding te na hi uh a, suahtakna taktak bang hiam cih zong note khentatna hi ding hi. Suahtakna taktak zong note kipiak bangbang hiding hi. Mihing lungsim tawngah suahtak lunggulhna taktak pen om a, tua pen a taka nuntakpihna ding na hanciam ding uh hi. Hangsan a kisap hun om a, na makaite un tua hangsanna a nei khin uh hi.

Na lampi uh sau in gimhuai dinga, na deihna uh hong dal hong khak om kha ding hi. Ahi zongin hih ka dinna panin a kikhel khat om a, a kilehkik thei hi nawnlo hi cih ka mu hi. Mipi deihna leh thapiakna in tua kikhelna thahatsak ding a, tua tangtunna gah a kilawh ciangin leitungbup etteh pha mahmah khat hong suak ding hi. Tua lampi na tot laitak un no guak lampai hilo in USA in zong hong tonpih hi cih na mangngilh kei un.

Lungdam.

Hau Za Cin

Phuitong Liim

Posted in: Thutatuam ( Siyin )