Zonagm a om vacim nam theampo sung pan, vaphual a lianbel a hi hi. Vacim nam sung teng pan in zongh a thupi bel vacim a hi hi. Zomi nam tepteena zongh vaphual a hi hi.Kawlngam in Union a kipsak hun 19.... kum in Zominam tepteena tu in vaphual kipsak hi. Vaphual sia a meal hoi in thupi sua mama hi. A thinsuang citak mama aa, a ki thipui ngam vacim a hi hi. Ki itna kip nei a hi kom, mihing nuntak na sung ah zongh a ettee taakin ki koi hi. Vaphual sia vacim dang te bang in muntheampo ah ki mu vazik ngol hi. Ngamhaam taam sung, mual le luam tamna, thingnga min tam na teng bek ah ki mu thei hi. A tam zaw Thaangkai ngam tengah ki mu thei bel hi. A tuii ciang vacim dang te bangin thingtung khawngah tuii kakoai ngol hi. Ngamhaam thingko liante zong in a sung khuk hi. Thinglian hawng sung ah mun laa a, bu tomin pua sitset hi. A pumpi theampo thinghawng a bu sungah kisealcip in, tuii hi. A op ciang zong a muk teng bek a pua sangah lawt sak hi. Tabangin a kiseal vacim a hi kom, a kiphual vacim ci na in “VAPHUAL” a ki ci a hi hi. Vaphual sia etlawmin a hoi mama mulham nei hi.A vom le a kaang tawh a kizeam tha nei hi. Lingmaw meal bang in a mualneal te san thim hiuhiau hi. A lungtang kisuangselawn kiukiau aa, a muk lian in sau aa, a luzang ah kidawl to diudeu hi. Ih et po ma in mipi sua mama hi. A kimat ciang, salian mat bang in ki ai hi. A lutang kitaak hi. A thate a kho mama mual lian veu a hi kom sawm pan sawm le nga ciang bang ngualin, bulhen a taang at ciang taang zapna tu in kivawt thei hi. A meipheakte hoi mama aa, thina nunna ah khanglui te in a lu tungah tuanin,ngual tungtuanna limin zangh hi. Thingnga min namcin le mawngnga min cite ne bel hi.A thingnga neak te tungah ngiak pai ngol hi. Zingsang phalvak tungin angiana panin a thiangnga min neak sia zuan hi. Thakhat thuin a thingnga min neak sia tung ah tu paih ngol hi. A kung thing dang khat tungah tu phot hi. Tasung pan hunk hop khat a etcik zawk ciang, ngal a muan ciang bekin a thingnga neak tu sia tung ah tu pheang hi. Tabang ciang laleau in nop om mama laleau aa, leang kheukho in haamngeeingui hi. A kap nuam te in hi bang hun veu tuungin pang kholin a dei po kap thei hi. Mihing te bang ma in vaphual te zong ki it, ki ngai thei hi. A koi bangdan ki teang ci ki heak pui ngol hi kale mo ki pui thei hi. Mopui tu a kuan uh ciang nii veu leang khawm vahel aa, zan khat ni khat bang a ngei zawkciang, a kuan na lampi sia ma zui in hong heak kik hi. Hong heak kik lam ciang thum hong pha aa, a laizang a sia kipuapha zawhiat a hikom a mo hi ki ci hi. A laizang a sia kizeam tuan mama aa, et hoi tuam mama se hi. Thum bang hong len khop ciangin a tha zap ngiang mama aa, khuathing in kipusuak aa, kien kheukho hi. Khanglui te in hi bang in la na phua hi. “Phualva mopui ih tungciang aa, a khaveng zap nging seau ee,…” Mihing te omzia, nuntak zia taw kibang kisa a hi kom, mopui tu khat a ki heak ciang in, “Vaphualno la tu” ci in ki heamson thei hi.Ngaknu Tangval meal pha pian khat sia vaphual no ki ci aa, zi nei pasal nei khat ih mun zongh ah “Vaphual man ni ziam?” kici thei hi. Mihing thupi, mihau milian te Vaphual bang kici aa, a phat na a thupi na teang keamcing zo ngol aa, siat sua zazen le “Vaphual kim lai va ak suak” ki ci hi. Vaphual nupa a kiteen zawk ciang tuii in op nuam hi.Taam thinglian hawng te sungah tuii in a op ciang a muk teng bek a pua sangah lawtsak siusuiau hi. A lu a pua ah lawt sak non ngol hi. A baal ( Apasal ) in anvaak hi. Khatvei po a bu puasia ah a lu lawtsak in khua en tha le, a baal sia in “Lawmdang ngai ni hi” ci in tulum paih thei hi. A noting zongh an a zon thei dong a pa ( a baal ) in vaak hi. A pa thina khat a nei le a nuta khawngin an ngawl aa, thu tu ahi hi. Mihing nupa kithuum thei bang ma in amate nupa zongh kithuum thei hi. Vaphual nupa a leang khawm, ahibale thing tungah a tokhawm khat kap leang a nungta lai sia atha khupin athi sia tuh na lei ah hongtaaksuk tu hi. Tabangin kithipui ngam hi Vaphual bu mu in a pui le a no laaksak le the, a baal sia a bu a thet kik ciang a zi le a ta te ki laaksak a hi kom, van ah leangto vingveng in, a thazal ngawlin suktun in leitangh kidenna in thipui hi. Kithipui ngam tatak hi. Vaphual bu mu aa, a pui le a no a la te in la thathong ngam ngawl hi. A bu sung ah suangtum no khat a hi ba le thinghiam nguahiam khat koi hamtang hi.Vaphual a baal in a bu tok vateak hi. Thingzum, nguazum, suangtum khat po a mu le pha tak in keam kik paih hi. Zi a zon nop kik hun ciang in, tua thingzum,nguazum,suangtum om sia a peang taw toai in a mo dokna ah keng hi. “Kei nginat ngawlna hangin ka zi,ka ta a khuai hi ngawl khi hi, hite in ka zi le ka ta hong thalup sak hi” ci in a mo dok na mun ah lak vateak aa, tasia ciang mo nei te in mo pia ngam pheang ci in kiciamtee hi. Khangluite in ngammang samang a mat ciang in ai aa, a lu taak hi. Tabang ma in Vaphual a mat ciang in ai aa, a lu kitaak hi. Vacim nam sung pan in, Vaphual sim ngol a ki ai om ngol hi. Vaphual mul sia kithupi ngaisut mama aa, keamcing nginge uh hi. Thina nopna tonna te ah Vaphual mul taw siim uh hi. Akngia sawnsan taw a lu tungah tuan in ngual tungtuan na lim in zangh hi. Khanglui te in hi bang in la phua hi. “Thang pan phualva hong laam aw ee, ka siang tuaimawng ah tu ee. Ngual zu dawn aw ka ci kal aa, ka sum tual ah hong laam ee.”
0 comments:
Post a Comment