By Ngin Khua Pau (Thuklai)
Miss Fanny J . Crosby sia American te hi a, a no lai a mitna sia, a kilempui ngawl mitza khat a noi thak hu in a mittaw hi. Tua hi a leitung hoinate a mu ngawl, a khuangaihuai numei khat hi. Khua mu thei ngawl ahihang a thuak pha mama ahikom a nu le a pa in New York khua mittaw saanginn ah laisinsak a, saangpatang sung pan a pilbel veu hi tawntung hi.
A khangno hunsung a phua late sia leitung ngualnop la veu tamzaw hi. A la phua teng sungah “Rosalie, The Praise Flower” a ci te bang tua hun dollar 3,000 bang a ngana late ahi hi. Kum 44 a phak ciangin Pathian Biakna la phua kipan hi. Tua hun Pathian Biakna la phuak minthang W.B. Bradbury in Miss Crosby sia Pathian Biakna la phua tu hanthawn a, 1864 kum pan 1915 a thi hun dong Pathian la bebek ngui 8000 sangin a tamzaw phuak hi.
1869 kumin New York khua sung numei kizuak te omna ah haw a, a mi mu thei ngawl ahihang a mittha taw a mu bek taw in .a thinna peuma hi. Hi numei kizuakte sia nuntakna zong numeite hi a, Jesu mu thei thong hen a, Ngumpa le Hunpa in saang thei thong le a thaa suakta in mipha suak kik thei tu ve ci hi. Tua ahikom Siyin Hymn Book sung No. 273 “A lal tu te hun in” (Rescue the Perishing) a ci sia phuak hi.
Miss Crosby sia thaa mangthang vei mama a hina taw kizui in hi la in tu ni dong mi tampite mission sep nopna thin neisak a, thaa bo sa tampi in Jesu Ngumpa le hunpa in saangsak hi. Miss Crosby ii upna le muanna sia Siyin Hymn No.423 verse 2 na ah ama ii upna pualaak a, leitung nate in Ngumna sia sak zo bo ci a phua sia in hong telsak hi. A mit in khua a mu ngawl mi cimaw nu hikale khua mu tu zongh Topa tungah ngen ngei ngawl a, leitung nate bangma lungngulh ngawl hi. Jesu um a, a muanna in nisim a thin nuamsak a, Vantung ngam a mu khol bangin thin nopna a nga sia Siyin Hymn No.328 “Lam Tawntung kei hong tonpui hi” ci a la phua sia in hong tel sak hi.
Miss Crosby ii la phua te peuma Thaa mit taw a muna, upna pualaakna veu tamzaw a, “Thinglamtee kungah” (Near the Cross) a ci Siyin Hymn No.120 bang en leang ama thaa in thinglamtee phung pan nuntakna tui a luang sia mi theampo atu a hina hong mu sak hi.
Miss Crosby in “Tuni” ci sia thupisak mama hi. Tuni in Jesu in nang le kei hong sam hi. Ki haisaangsak heak in. Na vanh ngit pi taw ma in zuan pai in. Zuan le teh Jesu in hong nial bo, ci in Siyin Hymn No.237 “Jesu in hong sam” (Jesus is calling) ah hong phawksak hi. Tua ban ah No.244 “Khia vun” (Lay it down) ci a phua la, “Nang atu mawmaina” (There is pardon for you) a ci Siyin Hymn No.245 ahizong, Siyin Hymn No.51 “Hong ngum thei hi” (Able to Deliver) ci a phua la ahizong, “Thaa muanna thupha” (Blessed Assurance) ci a phua No.340 na ahizong, La No.62 “Ama in ka thaa hong sealsak” (He Hideth my Soul) ci a phua late in nang le kei atu in a manpha mama khamh kammal late taw hong hanthawn hi.
Miss Fanny J . Crosby numei nu sia leitung ah a nuammaw bel ahi mit khuamu ngawl mihing hi. Ahizong Jesu ngumpa le hunpa in saang a, a piankik ciangin a mittaw hikale nisim naisim a thin nuam top a, Topa phawna la bebek phuakin tuni dong ama la phuate in thaa tampi man a, mi tampi mission sep tu lawpsak a, a thaneamte thahatna nga in, a pukte kiphongh hi.
Mittaw nu zongh Jesu mu thei ahile mit khuamu a, a vak thei, a cia thei nang le kei in mu thei kan zaw ngawl tu hi ziam? Bil taw ih za thei lai a, ih mit taw Lai Thiangtho ih sim thei lai hi. Tuni Jesu kammal ahi Miss Crosby la aw sungah za thei lai ni hi. Na thin na khosak lai le Jesu hong paipal tu a, hun na lap batha tu hi. Miss Crosby in La No. 162 ah “Ih kinging tek ziam?” ci in la aw taw hong dongh hi. Jesu a muak lian tu in Ngupna na nga zo ziam? Ngupna angate tel sitset hi. (1Jn. 5:13).
Miss Fanny J . Crosby sia a mittaw hikale Ngupna a nga hunlam kitel sinsen hi.
Nang e! Jn.1:12.
US Siyin Baptist Church ( Pan in na copy khi hi )
0 comments:
Post a Comment