VOMHZAANG KHUA SATNA THU

AD 1610 kum pawlin Thuantak khua ii sak sang hiat ah Vomhzaang khua kisat hi. Vomhzaang khua sat pupi te sia a nuai a teng ahi hi.

1. Pu Bat Kai
2. Pu Nei Zalh
3. Pu Sim Khum
4. Pu Sim Awi
5. Pu Tawng Suak
6. Pu Tawng Zeam te ahi uh hi.

Tua Vomhzaang khua sia Thuantak sak sang ah ahikom Khuasak ci in zongh na kina a, Vomhzaang khua ah tual a bawl ciang, tual phuisamna sungah khuasat pupi luk teng ii min teng belap uh a, Thuantak khuasat pupi nga teng taw a kingawm sawm le khat ii min sia a nuai a bang ahi hi.

“…. Nge Ngu khua sa na thiam in,
Hin Nung khua sa na thiam in,
Nun Zong khua sa na thiam in,
Dai Tawng khua sa na thiam in,
Vang Lok khua sa na thiam in,
Bat Kai khua sa na thiam in,
Nei Zalh khua sa na thiam in,
Sim Khum khua sa na thiam in,
Sim Awi khua sa na thiam in,
Tawng Suak khua sa na thiam in,
Tawng Zeam khua sa na thiam in, ……”

ci in tual phuisamna Khuathiam phui sungah kihel hi.

Hi hun lai in Vomhzaang khua kisat ahihang Thuantak khua ah zongh kiteang veve a, Thuantak le Vomhzaang khua nii ah inn a nei khawm zongh om hi tuak hi. Hi thu Pu Dai Tawng in a nuai a bangin la na phua hi.

(a) Ngeal khua ka laang ii nuai a, sawmsial a kii taangzau ee.
(b) Ngeal khua ka pataang tung a, hen kop beal bang pho ing nge.

Vomhzaang khua ah ten lai in “Zo” pawl te taw kiteang khawm a, khat vei ciang valuk mei le sazuk mei kituu in, Zo le Sizang kinawngkai a, Zo te in Sizangte nusia in hong taisan ahikom Sizangte bek a kiteang suak hi.

Copy:-siyinbaptist wordpress

Posted in: Tangthu ( Siyin )