ZOMI LE CIIMNUAI

Kawlzaang (Kalay) pan hong pusuakin duisung mual le luam te kantan a, Thuamvum hong theng to pawlte sia Mongoloid pan hong kipan Tibeto- Myanmar minam pi sungah a kihel Chin minam te ahi hi. Amate in mual le luam te nawkto in Thuamvum mual saangna hong thet zawkciang amate le amate “Zo” “Zomi” ci in hong kisam hong kina hi. “Zo” ci ciang munsaang na mun hi a, “mi” ci ciang mihing cina ahi hi. Tua hi a, “Zomi” ci ciang Zo ah a teang mi, mual tungah a teang mi ci in kikhia thei hi. Mualsaang dungah a teang te ci nopna hi tuak hi.

Thuamvum ah kum ngei lei ngawl a ten zawkciang pawl nii hong kisua a, pawlkhat te “Nuamkai” a kici na zaang kantan in tu a Saizang khua taw a kikhuala ngawl na mun “Ciimnuai” a kici na mun ah khua sat in hong teang hi. A dang pawlkhat te sia Thuamvum pan mualdung zuisuh in tu a “Thuklai” khua mawk “Zaangpitam” a kici
na mun ah “Zaangpitam” khua satin na teang hi.

Hun khat ciang khuahun le thu tatuam te hangin “Zaangpitam” a teang te “Ciimnuai” khua ah kingawm in hong teang khawm kik tek hi. Thuamvum pan a kikhen pawl nii te Ciimnuai ah hong teang khawm kik ahi hi. Zomi te Ciimnuai khua ah kum ngei hial ma na teang a, Ciimnuai sia Zomite atu a masa bel khuapi, Zomi te hong
kizelhna khuapi, phualpi khat ahi hi. Tu hun a min tatuam taw mun tatuam ah a teang Zomite in Ciimnuai pan hong piang Ciimnuai pan hong kizelh Zo ii suan le paal te hi a, unau khat ih hi hi. Tua hi a, Zomite tangthu
sungah Zomi te hong kizelh na khuapi Ciimnuai a kihel ngawlin a phamaw khat hong suak hi.

Ciimnuai khua taw kisai Zo ngeina la kiphuak te kimu thei a, Ciimnuai ah hausa seam ngei Pu Thuan Tak (Z-8) in a nuai a bangin la na nei hi. (1)

1. Thaangheam a vangkhua ka sa
cialdaw in vangkhua lum ee.
- Khuamual pheilam tam den ee,
lalthaa besam kai neal ee.

2. Vuisai ka kai a thang zaw maw,
Kawlmaang ka hen a thang zaw maw.
- Pataang cialsawn tam tung a,
lalhen kawlva tuang bang ze.

3. Laang hi veang nge laang hi veang nge
muvanlai bang laang hi veang nge.
- Ngial hi veang nge ngial hi veang nge
sa kamkei bang ngial hi veang nge

__________________________________________________
(1) U.K.T. Ngo Za Lian, Khuasak Khua Tangthu, (Unpublish), p. 4

Copy:- siyinbaptist wordpress

Posted in: Tangthu ( Siyin )