ZOMI TE LAI BOSUANA

Kawlzaang (Kalay) pan Khamtung ah a tai to pawlte sung lampui unau nii sia a pa in tua lai hun a, a kizangh lai at in pua sak hi ci in kiciamtee hi. A u atu in savun tungah at sak a, a nau atu in nguada tungah at sak hi. Amate unau sia Zaangpitam ah a teang te pawl sungah kihel in Zaangpitam ah a ten hun laitak a nau sia Khamtung ah ten tu uuk ngawlin Zaanglei ah cia suh kik hi. A nau ii Zaanglei a zot kik zawk, hun khat ciangin a u ii lai tepteena savun sia ui na tua sak a, kimu kik nawn ngawl hi. Ui na ne khawng hi tu hi kici hi. Tua hun pan kipan Zomite in “lai” nei nawn ngawl hi ci in kiciamtee hi.

Hi bangin lai a bosua ciang, a u in a nau tungah “Lai bosua thong khu hi, lai hilh tu in hong pai tan” ci in vaitha hi. A nau zongh Khamtung ah hong paito kikin Thaangmual pan khua hong en a, tu a Khuasak ngam Thavak, Zonaak cina mun teng ah a u te pawl ii lo thawna mu hi. Tasia ciang a u te ten na khua ah pai masa ngawlin lo sungah hong pai masa hi. Tua ni sia a u pa lo kuan ngawl ahikom, a nau taw kimu ngawl hi. A nau in a u ii lo sungah ama ii heak ngei ngawl lo hunna tatuam te, thaang sia na vacim zunam matna te, le lo hunna tuibungh te a mu ciang lamdang sa mama a e en phet hi tuak hi. A u ii vanhzak te a mu ciang a nau in hi bangin ngaisun hi. “Ka u in hi bangin na lamdang te a thak in ngaisun a vawt thei, bitphua thei ahi ciang lai mangil ngawl tu hi. Lai ka bosua a ci sia hong theamna hi tu hi. Kei bangziam maw khat hong law nuam po hi vak” ci in ngaisun a, a u taw kimu nawn ngawlin Zaanglei ah cia suh kik hi. Hi bangin a nau hong pai to hunlam a u in tua ni lo kuan te tung pan he a, ahizong lai nga kik nawn ngawl hi. Tua hun pan kipan Zomite lai nei nawn ngawlin lai taw hong nungta nawn ngawl hi kici hi. (1)

__________________________________________________
(1) L.B.Naylor, A Practical Handbook of the Chin Language pp.46-47

Copy:- siyinbaptist wordpress

Posted in: Tangthu ( Siyin )