LOPHEI

Map Reference – RU 1973
Elevation – 5471 ft

Sizang mite Thuantak le Vomhzang ah ten tek lai in Pu Kiim Lel in Lophei lo (Tu laitak Khuasak Khuanuai innmun) na tho hi. A lo sia phei dingdeng ahikom tua mun sia Lophei kici hi. AD 1640 kum pawl in Pu Kiim Lel tua Lophei mun ah inntuan in na teang hi. Tua mun ah khang sali dong teang a, tua mun ah a ten pui ama ii suan le paal teng Lophei te kici paih hi.

AD 1814 kim pawl Pu Lua Tung khan ciang ama lampui na taw Phuk khua sat phei hi. Ngal le sa hang ahizong, ciidam thei ngawlna hang ahizong Lophei pawl te sia Khuatung, Khuanuai, Eaktaak, Taapdawp (Thuklai), Haikhua, Khualui (Khuasak) le Phuk ci te ah teang kakoai ngei hi. 1891 kum ciang Pu Khup Lian sia Mikaang kumpi in ukpi (chief) nga sak a, ama lampui na taw tu laitak Lophei khua ii thang hiat ah khua sat hi. 1910 kum ciang tu laitak Lophei khua sia Mikaang kumpite oaina taw a kisat ahi hi.

Lophei khua ah 1946 kum ciangin mawtaw theng thei hi. Ngalpi niina man zawk 1952 kum ciang Thuklai khua taw telephone khau kizom a, Thuklai, Buanman, Khuasak, Limkhai Bungh le Voklaak khua te telephone taw kipaupui thei hi. 1986 kum ciang kumpi te in Basic Primary School phuat sak hi.

Biakna taw kisai in a pat pan kipan Lawki ngeina om hi. 1928 kum ciang Pu Vum Cin le a zi Pi Suak Neam te Tuiphum Tapidaw suak hi. 1952 kum ciang Thuklai Tuiphum Pawlpi pan inntuan a, Lophei Tuiphum Pawlpi kiphuan hi. R.C. biakna zongh tua kum 1952 ciang hong theng a, 1976 ciang A.G. Pawlpi hong piang thua lai hi.

Copy:- siyintist wordpress

Posted in: Tangthu ( Siyin )