Kum zalom sawm le kua hun sungin Sizang
pasalte in khup ciang bang a tual puan laktong puan na silh hi. Khualum
ciang ahile puan silh ngawlin dial teang in om hi. A tamzaw in saihapak
dial ci in dial kaang veu khim hi. Pasal khanghaam pawl ahi zawkciang
khipi ngui a ngawng ah awh hi. Pasal peuma in a sam hoai in a tukkhuk
tungah tuktumh tum hi. Tua tuktumh sia ngal aih sa aih ciang akngia tot
natu a ngaisut ahi hi. Duisung vak tu, savai tu, ngalsim tu ci bang a
kipat ciang puantual silhte le puantente teang ngawl zaw in ngoaile taw
kithoai zaw hi. Pasal khat in inn pan pusuak in ngam vak khualhaw tu ahi
nale kawngnaam khat kua hamtang hi.
Nidang Sizang
ngaknunote in mawkthak a kici khau bebek a kai hilhel in a kivawt khup
ciang a pha nikboai na teang hi. Puan laktong sia a kaang baan tawng veu
silh thei bel hi. Nupite in khup tan a pha nik sing teang hi. Zu sung
sa sung le poai sungah a pai tu ciang “tawnok” a kici ngeina numei dial
silhthua in kizeam hi. Tua zawkciang khi tam a nei zo tu a awh zo tu sia
numeite kidem khat ahi hi. Ngaknute in a sam vawt ciang khen thum in
khen a, khen niite a ziat le a vei ah a kaai tu in pheak suh hi. A
nungsang ah a kai khen sia “sambeh” ci in a sikli nei tu in puan khau
taw sawm hi. Pasal a nei ciang “bakhen” ci in a sam a ziat le a vei ah
khen nii bek sua in, “sampalh” ci in ngeina om bang tumin kai sak hi.
Tua ahikom numei khat ih mu ciang a sam vawtdan en in, ngaknu ahile
pasal nei sa nupi sa ahi kihe thei paih hi.
0 comments:
Post a Comment