Sizang ngeina sungah innkuan khat in nau
nei ciang innkun ah nauling khai in, innkun tang hi. Innkun kikantan
thei ngawl hi. Nau pa ahile ni sali tang a, numei ahile ni nga sung tang
hi. Nau pa ahile akluimei, saili (Ngua saili), thung khat le naamno
khat innkun ah kikhai hi. Nau numei ahile tuman no khat, khuei ngip
tanghno khat le law no khat kikhai hi. Tua hun sungin nau neite kungah
tanghuu, taaksi le an tui lim voksa tui, aksa tui ci bang kipuak a, hi
bang vawtna “Nau an thah” kici hi. Hi bangin nau an thah sia meal heak
sung pan zongh, lawm le ngual sung pan zongh in om thei hi.
Nau nei po
ciang minno khat kipia masa paih hi. Hi bangin minno pia paih masa bua
in hi leang doaite in teptee sak a, nau thi thei ci in um hi. Nau min pi
tatak tu sia ni tawm vei zawk ciangin phuak pheang hi.
Nau min phua ciang nau pa ahile nau nei
zawk ni nga ni, numei ahile ni thum ni in a min kiphuak hi. Nau min tu
sia nau ii pa le nu, pi le pute in phuak a, nau nei masa bel sia pa
ahile a Pa sang panin a pu, numei ahile a pa sang panin a pi ci bang
kitap sak thei hi. A suak kikte Nu sang panin pute pite ma a zawzom in
tap kipia hi. Ahizongh tap tu sia nau nei innkuante ii thu hi a, Nu sang
pan pu le pu zongh a tap sak nuamte in tap sak thei hi. Pu le pite tap
sak zawkciang pate sung u le nau sungah tap a nga tu kilawm bangin
kihawm hi. Nau nei hun in pa le nu, suapui, mealheak sung a thi a bo om
le zong minlaw na in kitap sak thei hi. Nau min sia a khiakna nei in
kiphuak hi. Min son bek taw in a tap pu, a tap pi bangbang hi ci
ahizong, baangkua sung bangbang hi cite kingaisut sak thei hi.
Nau pa khat ii a min phua tu ciang zu
phealbiing no khat, thal le thaltang, uum peu khat le saku ling khat
pialthang naumin phua natu mun ah kikoi hi. Nau min phuak tu in a sap
thiampi pa hong thet ciang zu taw leangna do in nu le pate in a dei nau
min tu son pui hi.
Nau min phua tu ciang a mun ah nau a nu
ahibale a pi in toai in topui hi. Thiampi pa in a mawk pan in thum vei
zu phii a, en hi. Zu phiina sung panin nau ii pianzia pha tu pha ngawl
tu ci he thei hi. Thiampi pa in uumpeu le saku ling la in nau min lo in a
nuai a bang in pau hi.
“Nau awng tu in na min. . . . . . . .
. . . . . ci in hong phuak khi hi. Simlei tungah na nuntak sungin na
khipi tang baa natu, na heisa paak baa natu na bil hong vut khi hi” ci in uumpeu le saku ling taw a bil kivut theam sak hi. Tua zawkciang thal le thaltang la in “Simlei
tungah na nuntak sung in na saitang kaa natu, na sialtang kaa natu, na
ngalhtang kaa natu in hi thal le thaltang hong pia khi hi” ci in thal nau ii kap tu bangin vawt sak hi. Tua awkciang “Kei
thiampi pa in thuthak vawt hi ngawl khi hi. Ka pu nungzui khi hi. Ka pa
nungzui khi hi. Hi nau tungtaang ah a sia sak nuam, a kha sak nuam a om
le ka mimpi zu in, ka taangpi zu in lamvei zot pui tahen, lamziat zot
pui tahen” ci in kip sak hi.
Numei naumin phua ciang ahile thal le thaltang kisamh sak ngawl a, a phuisam a pau na sungah bil a vuu ciang, “. . . Na kealmeitang baa natu, na naptolpaak baa natu. . . “ ci in kilamdang sak hi.
0 comments:
Post a Comment