Hi hun lai in Sizangte ii hauna sia sum
le paaite taw kison thei ngawl a, mihing khat ii a hauna sia sial bangza
nei, loai bangza nei, khui bangza nei, zam, daak, thau,…. bangza nei,
khi bangza nei, innteang bangza nei cite taw kiciangtan hi. Khantona ci
hang tu hun ngual ii a vuum a saal in nei natu na a kiseam hi ngawl a,
nuntak khom natu in na a kiseam ahi hi. Nuntak natu zongin nasepna ah
Pasalte ii a nasep pi sia ngal sim le sa vai hi a, numeite ii nasep pi
sia lo thaw thing puak, inn nasep ahi hi. Tua hi a Sizangte ii pauzang
seena sungah “Ngal sim le sa vai sia Pasalte nasep hi a, lothaw
thingpuak sia numeite le innteangte nasep hi” ci hi.
A masa hun
khat lai in sa vai sa mat bek taw kivaak in nuntak thei hun na om a,
ahizong hun khat ciang hi zo bup ngawlin lo thaw le ngan khoai nasep
zongh seam to hi le kilawm hi. Lo thaw sia mual tung lothaw hi a, eima
neak khop nga zawk natu a kihanciam ahi hi. Nganhing khoai zongh innkuan
ii zaw khop tu in a kikhoai ahi hi. Hi hun in Sizangte ii Lothaw
anciinte en leang thing nga thing kung ci bang kum tam a kikhom tu neak
thei kungte kiciing ngawl a, kum khat sungin a tung papaih thaw ante veu
na ciing tek zaw ci sia kingaisun thei hi.
Khut thiamna taw kisai nasep sia hi hunin
thau, tei, naam, hei cite kizangh zo ahikom thik seak thei om zo tu hi
ci sia kingaisun thei hi. Naam taw nguasat in naang leam in law, ciang,
bawm, lang, . . . cite sa thei in vawt thei hi. Naam le heite zangh in
inn sung zak tu thing pakan, thing salung, thing hai, butei, . . . ci
vanhzak tatuam zongh na vawt thei hi. Hi hun nuntak khanto zia ih et
ciang sum, dangkaa zangh in vanh lei vanh zuak cite om ngawl lai a, vanh
zuak vanh lei nop ciang a vanh tetek kitheak hi. Tua hi a, hi hun in
Sizangte nuntak khantozia sia niam mama lai ci thu cian takin kingaisun
thei hi.
0 comments:
Post a Comment