Sizang ngeina sungah mithi khat a om
ciang “Thaam” vel in tua sungah mithi kikoi a, sa a minpiang khat ngo
in, zuluup in, la sa in, kilaam hi. Hi bangin vawtna sia mithi mai kici
hi. Zingsang in thi ahile nisun maa in kimai hamtang a, nitak zawkciang
thi ahile a zing ciangin kimai thei pheang hi. Mithi mai zawkciang tua
mithi sia than ah kiphum paih ngawlin, a kuang sungah koi in inn sungah
kiphek hi. Hi bangin mithi phete “Mithi panglai kici a, a kivui mateng a
nungta in kingaisun ahikom an neak sim, tui neak sim in, mithi atu
zongh khen in kisia hi. Hi bangin mithi panglai in koina sia itna lakna
in a kingaisun ahi hi.
Pa ngalthiang
aih ngawl lai in a thi ahile a mai ni in vokpano khat ngo a, ngalthiang
ki aih sak phot hi. Banghangziam cile pa a minpiang kiminlaw nuam a,
ngalthiang aih sa ahibale kiminlaw thei ngawl hi. Ngalthiang aih na a
vawt sak zawkciang minlaw thei pheang hi. Hi bangin ngalthiang aih sa
khat le, ngal thiang aih ngawllai khat a thi ciang kilamdang a, a koi
dan a om sak dan zongh kibang sak ngawl hi.
Mithi pang lai neite ii bangkua pan khat
papo in sa kap in sa mat a nei le “Mithi ngin” ci in zuluup in, la sa uh
hi. Hi bangin mithi panglai nei laitak sa kaa, sa mat nei simin mithi
ngit kul hamtang a, sa sawm vei kap in a man le mithi zongh sawm vei ma
kingin hi.
Mithi panglai sia uk tan vei kikoi thei
a, khat vei ciang ‘Mithi vui” ci in vuina vawt in than kitang sak hi.
Mithi vui ni ciangin sa ngo in, zuluup in, la sa in kilaam hi. Mithi vui
ni sa ngaw sia, mithi mai ni sa ngaw sia ii sangin no zaw ngawl tu hi.
Hi bangin mithi vui ni sa ngaw sia “Lamtak” kici a, lamtak tam a nei zo
tu sia kidemna khat ahi hi. Mithi vui sia pasal ngalthiang aih sa ahile
“Ngaltheam” ci in pawlkhat in mithi zawng kawmin laam a, pawlkhatte in
ngamkuan ciangin ngalsim dan ngaltheam dan heang uh hi. Nitak khuazin
zawk pawlin mithi than kizot pui a vui in than kitang sak hi.
“Sulsong” a kici numei pasal nei sa a
nungsang zuan kikte a nungsang inn pan thi in a kivui le than kuan tu
mithi pusua ciang kong biang tot ngeina pan pusua pui ngawlin kongbiang
thang sang mun khat hong hamtang a, tuak panin pusua pui hi. Tua ahikom
nidang Sizang numeite pasal nei sa ahi na le a nungsang zotkik tu sia a
uk ngawl bel thu khat ahi hi.
0 comments:
Post a Comment