Suang man pha (Tenpung)


1950 kum in savai te duisung /ngamsung ava na pan in “Thaitha” kici na ngamkuam sung athet ciangin “Suang man pha” vom kikel, apa dikdek pawl khat a mu uh ciang akhua sasuk le adaawl adawl in a om a mu masabelh sia Pu On Thang le Pu Sing Do tea hi hi. Tua a mu uh Suang man pha sia duisung / ngamsung pan a cia uh ciang a innkuan puite tung le khuasung u le nau te tungah son kakawi uh hi. Tua ason na tungtawn in Pu Sing Do ii pa Pu Lam On in tua Suangmanpha te to in Limkhai ngam sungah Suang inn samasa belh hi.



1960 kum in kawlngam kumpi sang alian te in “Loatdaw” Zum inn pi tu in dei a, sanuam ahikom in, Tedim Township (Nah Lah Kah) Ukkatha Bogyi Aye Maung hong pai sakzawk ciang leisung enthiam U Ngaw Cin Pau hongpai sak kik in hong et sak a, (ေက်ာက္သင္ပုန္း)Tenpung tu bek in pha sa hi.



Tua ahi kom kumpi te in Tenpung (ေက်ာက္သင္ပုန္း) vawtna tu in a kisam van tatuam teleh set leh setvanh teng hong lei sak tu in dangka Kyat 30,000/- hong pia hi. U Ngul Pum leh U Hau Nang Tenpung (ေက်ာက္သင္ပုန္း) vawtdan sintu in 1967 kum in Balu Island (ဘီလူးကၽြန္း) ah ki pai suk sak hi.



Tenpung (ေက်ာက္သင္ပုန္း) vawtdan ong in hongcia to kikciang kumpi te ii hongpiak vanh tatuam teng kawlpan in hong pua to uh a, Limkhai (Zo) ah hong theng to siat hi. Committee te khat ki phuan in Committee te lampui na tawh ki kalsuan phot hi.



Kumpi te-in Tamah (သမ) taw kalsuantu phasa zaw ahi kom (ျပည္နယ္ သ/မ ဦးစီးဌာန) U Tun Thawng tungah kiseau a, 1976-77 kum ciang in (စက္မႈထုတ္သ/မအသင္း) ci-in (ဇ-86) number hong pia a,kum sawm sung na kiseam in ki kalsuan kik hi. Haksat na tatuam hang in ngaihsut bang hong piang thei ngawl hi.



Tua hun lai tak in Hausa te ii vaihawm thiamna taw 5/6 HP. Cobuta with generator 2 KVA khat sia kumpi te ii hongpiak om nginge ahi kom, 1979 kum ciang Committee te vaihawm in khua le tui sungah Electric meidet tu in lung kim tek na thukhen satna nei uh hi. A lung kim tekna tungtawn in meikhau Thuklai le Voklak pan lei tu in vaihawm uh hi. Thuklai pan pikhat pyas 50 (Cent) pawl khat le pikhat Pyas 75 (Cent) pawl khat avekpi, pi 5000 kilei hi. A kisam tu meivanh tatuam te mei lanuam te in hanciam tek in leitek uh hi.

Limkhai (Zongal) khua ah Electric mei 5th July 1980 ni-in (ျပည္နယ္ သ/မ ဦးစီးမွဴး) U Tun Thawng a hi zong. (ၿမိဳ႕နယ္လုပ္ငန္းစစ္စီးေရး) Chairman U Hang Za Nang leh a lawm te taw ahi zong, kisam a, U Tun Thawng (ဖဲၾကိဳး) attan nataw U Lua Ngin te inn ah Khui lian mama khat kingo in meihonpawi ki vawt hi. Tua ni pan kipan khuasung ah Electric mei kizangh kitangsak zihziah hi. Topa Pathian in khuazing sungah khuavak hongtansak na thupha hi ci-in Pathian min ih pok hi.



Dynamo leh Diesel Engine zakzawk kum thum zawkciang Dr. A Lian Zang in tuithataw mei det thei na tu TIC PIN a ki ci biakna sang ki pawl na khat pan in huna hongngen in sumtang pawlkhat tawh in hong hu hi. Tui thataw meidet theina tu Tuanmual ah taangpi te ii hanciam na taw tuikhol natu tuibeam lian mama khat kivawt hi.



Kiallap in zakzi thei tu khat ki vai hawm a, 1984 kum ciang, Taam U Tual Thawng lo a ngasa khawi na tuikhuk sia kin gen hi. Tuikhuk pan in pi 300 aniam suk na ah meiset kinga hi. Hamciam tek na taw 1984 kum sung in tuitha taw khuasungah Electric meizangh in ki tangsak hi.



Pi Ciin Ciang le Nupi / Pasal khangham pawlkhat te in leitung abo zongin tuitha taw mei kide thei ngei bo. Um mama bong ci-in lupei vamel bek hi ka le mei atan thei tak ciang lamdang sa mama uh a hi kom, a lungdam na uh langui tam tatak ma phua uh hi. Pipe tam ma vallai ahi kom pi 700 dong kipe suk vet hi. Tu ni ciangdong hi tuimei sia ma akizak laitak a hi hi.



Limkhai ngam pan in apiang “Suangmanpha” taw ki sai nasep na tung tawn in Topa Pathian in thupha hongpia a, khuazing sung ah khuavak tanna thupha anuam mama in kizangh ahi kom in Topa min ih pok hi.



Ref: Centenary Christian Jubilee Magazine
Limkhai innkuan pan copy hi.

Posted in: Articles ( Siyin )