SIALDOAI BIAK KIPATNA LE SIZANG PAN TAINA

Pu Thuan Tak thi zawkciang Nge Ngu te nuta khawng a mealheak te taw Sizang khua ah teang lai hi. Tua hun lai in Nge Ngu nu a ciina a, a dam thei ngawl ciang a nu in “Nge Ngu awng, na pu te sial doai na hong pet hi tu in ki um ka hi ciang na pu te sial lu taak te sung pan sialkii khat va la tan a, tua sialkii sung pan tui mut in ne leng dam tu ki um veang aw” ci hi. Nge Ngu in a pute kung pan sialkii khat a laak zawkciang a sungah tui koi in a nu pia hi. A nu in, “Ka pu sial doai, ka pa sial doai na hong pet ahile sial taw hong bia khi hi” ci in sialkii sung a tui sia ne hi. Tasia ciang a nu hong nuamtuam zaw hiat hi. Sial doai in pet hi ci sia maan sa tek ahikom Nge Ngu in a pu sial khat leitoai in sialdoai bia hi. Taciang a nu a ciidam hi. Hi sia in Sizang mite ii sialdoai biak kipatna ahi hi.(1)

Hi bangin Nge Ngu te nuta khawng in sialdoai a biak ciang a mealheak dang teng in dik sa ngawlin, “Pu biak ngei ngawl, pa biak ngei ngawl hi sialdoai na biak uh….” ci in om tek ten khop tek tu uuk nawn ngawlin, Nge Ngu te nuta khawng nusia in Ciimnuai le Sizang pan mun dang ah teang tu in tai tek uh hi. Tua zawk in Nge Ngu te nuta khawng sia a nu ii nusiat dong Sizang ah teang lai hi. A nu ii nusiat zawkciang Nge Ngu te unau khawng Sizang ah ten tu a thaa ta nawn ngawl hi. Zaangpitam pan Ciimnuai ah hong kingawm kik te ii son, Zaangpitam mawk ngamkuam teng sia ngam pha mama a, ten natu zong nop tuak mama hi a ci sia phawk kikin tua mun sang zot tu sawm hi. Tasia ciang Nge Ngu te unau nga lampui in a innkuan tek taw khuathak sat tu in Sizang nusia in hong pai uh hi. Tua sungah a lampui Nge Ngu te unau nga teng ii min sia Nge Ngu, Hin Nung, Nun Zong, Dai Tawng le Vanglok te ahi hi.

Hi bangin Ciimnuai le Sizang khua pan a pawl a pawl in a kitai tek ciang, Ciimnuai ah a om lai teng sia “Thawm Pu” kici Thawmte lampui pa in hausa seamin uk a, shia kai in nuamsa takin om lai hi. Tua zawkciang Ciimnuai khua sia Saizangte in sim a, Ciimnuai khua bo in, Thawmte Kalzang zuan ahi hunlam Thawm Pu la phua te tungtawn in kihe thei hi. Kalzang sia tu laitak Thuklai ngam hi a, Sizang tangthu sungah a thupi mun khat ahi hi.

Thawm Pu Late
A kaih
1. Thawm ii tu te le hau in khua siam ta nuai a le leng sial dim ee tung a le ngo sai beam thul a ka sia hi ze.
- Vang sak pui awng nge sum bang soi nga te kim pui ka lel bei a, khua kiim ah shia kuang ka kai hi ze.

A naw
2. Toai ii vum ih tun nu aw sai tui val tangh ka sumtual ah zozaam lun lai bang ze.
- Mang ii tun ni bang taang hi ve awkhi lai a vei ee zaang a nipi paak lun lai bang ze.

3. Zua ten daal aw tha a phal lo tangh taang sial ka ngul tuk ni Sai tui tan pat bang hong sai hi ze.
- Zua ten daal le vangkhua phal lo tangh, khua kiim shiakuang aw ee, Ciim khua kheap taang bang hong zau hi ze.

4. Thang ngunpui sial bang lian a, ciin le tuai in tuanglam a nei thi bat phu tung na ee.
- Lal tangh dai sat nung le maa kaal tangh zu bang ka mawl lai a, puak lel han loai ka thang hi ze.

A thipna
5. Ka laang nuai a sawmsial lian huang a khia nge sawmsial lam leng zinleang ka biakna hi ze.
- Sawmsial lam leng zinleang ka biakna hi a, awkhi lam leng ngual kim ka lu na hi ze.

6. Miza pau ten Kaaltui suan peam aw ci ze Kaaltui suan peam mim le sawmtaang huai veang nge.
- Mim le sawmtaang sungdip taw langlamh tam taw neal bang ka hau khua van nuai a thang veang nge.

Hi bangin Ciimnuai khua bo a, Sizang tangthu sia Thuan Tak khua ah kipan kik a, Sizang kual pan khangto hi.

__________________________________________________
(1) L.B.Naylor, A Practical Handbook of the Chin Language pp.45-46


Copy:- siyinbaptist wordpress

Posted in: Tangthu ( Siyin )