UN ah N-Korea thu kikum

 North Korea ngam na 2012 December tha sung kuama awi ngawl in rocket tha ahikom, UN ii security council na dan piak tu ki kum aa, khensatna nei hi. UN na control room pan aki control thei rocket le Nuclear vawt tu nasia tatak in khaam hi. North Korea na tua thukhaam paltan ahikom dik kisa vet ngawl hi ci in UN security council meeting minutes sung ah at hi. Meeting minutes sung ah thukhensatna 20 kikhensat aa, UN security member 15 theampo in, langpang om ngawl panpui siat hi.

Khensatna thak sung ah North Korea ngam Space agency lampuipi Paek Chang-ho le adang mihing 9, UN ii black list sung hel in ciamte hi. UN black list sung aki hel peuma leitung ngamdang koima khual haw thei ngawl aa, khualhaw le zong kaipui (police) te in man tu hi. Tuabek dom ngawl ngamdang ah neisa a nei uh le, ki laak sak siat tu hi. Sontena Swiss bank khawng ah sum kep a nei uh le zong, a sum thuk kik thei ngawl tu hi.

North Korea atu athuakna nasia mama dang khat sia, UN security council vawt sim North Korea a ngum tawntung, a panpui tawntung a lawm pha bel ahi, China zong na tutung ngum ngawl in UN security council ii khensatna panpui hi.
by :- Thawngno

Posted in: Thutatuam ( Siyin )