Thuklai Kum (100) Cin le Tuivai

56 BOYARNYUNT STREET, YAWMINGYI WARD

THAZIN CONDO APT # 304

DAGON, YANGON

 

15 January 2013

 

ATHU:            THUKLAI SANG LE ZATO TUIVAI:

 

Kong it Sizang U le Naute:

 

April 10, 2013 ciang Thuklai Christian Centennial kivawt tu a, tui kisam ahikom Mangbuluam pan tui la tu a kici ciang kei zong kihel nuam khi hi ka ci pai hi.  Tai 4 khuala a, elevation pi 70 bek kisam a ci ciang feasible ngawl tu ka lau hi ka ci khol zo hi.  Mincim si a, liang tam ma ma ahiciang feasible ngawl hi. 

 

1956-1962 dong Thuklai sang ka ka a, ID # 905 ka hi hi.  Sizangte in tuimei vak thei tu ii hanciam zawk ngei zo a, 1991 ciangin Sizang pasalte taw Luipi nak dong ki en hi.  20 February 1996 niciang $100,920 nga na tu Japan Embassy ah letmat kithu thei a, vai tuatuam hangin mei kivawt pai ngawlin ii buaipui peuh ma hi. Bangbang hikale Pastor Tember Chit hunsung in ii hanciam pui tek na le Topa Pathian thupha hangin tuni ciang dong ii zang thei a, Topa min ka pok masa hi.

 

Yangon pan in Tui Committee zong ii nei zo hi.  Vaihawm tu tatak a om ciang lu kisi tua in ii vaihawm kul tu hi.  A thu ma ma tel phot ka ci ciang K150,000 hong kipia a, tuasung pan K30,000 sia Kawlpi le Thuklai pai le cia a tu ahi hi.  Dr. Dal in a motor hong zangh sak a, ahawl tu zong volunteer om ahiciang diesel gallon 6 thun in ka zangh a, Thuklai hausapa in gallon 4 hong thun si hi.  Hong vaihawm sak theampo tungah ka lungdam hi.

 

Siapipa Sing Cin Thang in innlum, puanlum taw hong zindo a, anneak tu zong hong vaihawm sak a, hausa nu in hong huan sak a, lungdam ka ci ciang Thual Dal te hanciamna tam bel hi hong ci hi.  Thuklai, Pumva, Buanman le Lophei hausate taw tuinak ka na en uh a, hong kilak sia a ki ne ngawl WCC tuinak le tu laitak a kine Source #2 a kici sia ahi hi.  Minam dangte in Sizangte kangsung bebek hong ci kasap, Pu Son Ko Lian hanciam ahihang aana bangma na zangh ngawl hi.  Pu Son Ko Lian le Pu Vontu Ha Sing te taw Tuilam Zon Manna poai 21 April 1964 in kivawt hi.  1968 Union Day Thuklai ah vawt tu lametna om hi.  6 Nov 1965 ciang tangpi kikhawm a, 13 Nov 65 ciang tuinak khuat in ki kuan hi.  21 April 66 ciang Pu Son Ko Lian lampui in tuilam vawt vai kikuan tui ne tu khua 4 pan 31 le Khuasak pan Pu Vum Za Dal le midang 6 zong kihel hi.  A nitak in khui 2 ngo in Pu SKLian inn ah vai kitung hi.  Bona zanna teng Pu SKLian, Dr. Khup Za Pum le Pu Thawng Ko Hau in sii hi. 

 

Anneak zawk ciang thu kikupna om a, tu a, Tuinak sia Pu Thawng Nang (Lophei) mu ahiciang noptuam bang pia tu ziam a kici ciang Pu SKLian in tangpi a tu hi ve, lungdam ii ci paih batu ziam ci hi. 

 

4 Dec 1974 ciang Pu Ngo Thawng inn ah kikhawm in tuivai panmun len officer bearer 7 le member 13 avekpi 20 kiteal hi. Thasum khat tek ngawm tua tu dong in thukim a, 1 Jan 1975 pan 31 Dec 1977 sung khia siat tu zong thukim uh hi.  Innsim in K100 nuai sia khia thei ngawl tu ci in thukim uh hi. 

 

21 April 1975 ciangin tuinak vawt tu nguai an keng in mihing 6 kuan hi.  5'x5'x4' tuinak khat kivawt a, zangh ngawl lai in tua kum tuuk sung ma min in taai hi.  27 April pan 1 May 1976 dong khat vei tuinak vawt kik hi.  2 Jan 1979 ciang Pu Lam Za Pum inn ah sunkhua ma kikhawm a, Thuklai pan 25, Pumva pan 3, Lophei pan 3 kikhawm uh hi. 

 

January 2, 1979 ciang  officer bearer 7 le member 14 le patron Pu Tun Za Pum te kiteal hi.  10 March 1979 committee kikhop ah sumkhiak sa om za sak hi.  Tua sungah 4 Dec 1974 pan pek Pu Ngin Thian Pum lampuina taw a sekdo mihing 38 in K1000 tek khiak tu a sep se tuni ciangin asekdo mihing 109 pha hi.

 

8 July 1980 ciang Pu Thang Khaw Vungh, Pu Suan Khaw Cin le Pu Tun Pau te in tuilam tee a, Akluai Tuinak #2 pan SHS sayapipa zum dong Tai 4, furlong 2, thikkhau 3 pha hi. 

 

20 May 1983 ciang Pu Suan Khaw Cin in tee kik a, Tuinak pan SHS dong tai 4 furlong 2, thikkau 4 hi ci a, amasate tee na sang Pu Suan Khaw Cin tee kikna thikkhau khat sau zaw hi Tuinak pan Phaipheakciang dong 7656'; (Tai 1, furlong 3, thikkhau 6); Phaipheakciang pan Kamkeiciang (Ngalvum) tuibeam dong 12,630' (Tai 2, furlong 3, thikkhau 1 le yard 8) ci hi. Tua ahiciang Tuinak pan Kamkeiciang (Ngalvum) Tuibeam dong Tai 3, furlong 6, thikkhau 7 le yard 4 ahi hi. Phaipheakciang pan SHS zum dong  2 miles 6 furlongs, 8 chains pha hi ci ahizong, Tuinak pan SHS Zum dong tee na ii et ciang Kamkeiciang (Ngalvuum) Tuibeam pan SHS Zum sia furlong 3, thikkhau 7 le yard 4 (2454') hi a, Sayapipa Sing Cin Thang le hausate taw  Assembly Hall tung dong  pi 3,000 ci in ka kip sak uh hi.   

 

6-7 November 2012: Survey: Sayapi Sing Cin Thang le hausate taw report hong piakna Tuinaak pan Phaipheakciang 8,750'; Phaipheakciang pan Kamkeiciang Tuibeam dong 11,800' Tuibeam pan Assembly Hall zang botung Tuibeam Thak om na tu dong 3000' a kingawm 23,550'  (4.46 miles Tai 4 le furlong 4 ci tawng) ci in ka ciamte uh hi.   

 

TUINAK KA MU NA

 

Tuinak se suang sung pan hong phuul khawng ka dei hi.  Tui tam ma zong kidei hi.  Sayapi Sing Cin Thang in furlong 2 khawng pai lai leang tampi in tam hong ci hi.  Ahihang kei hong kilak sia

 

1)      Tui teautuak no khat om a, khallai tuikang hi.  A nuai sangah Zozam Tuinak om kici hi.   Hong kilak bua hi.

2)      A 2na hong kilak sia PVC pipe kibul a, WCC Tuinak kici hi.  Tasia kine nawn ngawl a, tuimei in kizangh hi.

3)      Hong kilak pi Tuinak sia Pu Thawng Nang (Lophei Tuinak) hi.  25 gpm (gallon per minute) a kici ciang hawmthaw a, zong lai in kisawl hi. 

4)      Tuinak 2na kimu hi.  Unicef te in tua Tuinak kimu kik sia AKLUAI I (Flow 30 gpm) hong ci sak a, amasa si AKLUAI II (Flow 34.34 gpm) hong ci sak zaw hi.  Kei Akluai I sia hong kilak bua hi.

 

THINNOP HUAI NGAWL

Tuipiak zawk na tu hanciam tu hi kasap, a naak thak lai tu hi ngawl a, 'supplement-apia thua' tu ahi hi.  Alaih tu hi leang tuinak lui teng zangh tu a, phamaw ngawl hi.  7 Nov nizing sia toih ma ma tu na hi ciang zingciang vaihawm khol hang tho zo buan ci te hong kici ahihang kei 3 a.m. masia in khua ka phawk a, 3:15 a.m. meii hong pai hi.  Tasia ciang kei zong ka tho pai a, LTT sim in zing ngeina teng ka vawt hi.

 

Sayagyi Sing Cin Thang hong thaw ciang, "Saya Sing, Mangkangte cidan hi le, "I am not happy.  What a confusion?" ka ci hi.  Ih tuineak zanglai nong lak uh bang law tu hi ziam?  Hausapa zong hong theng a, Zozam tuinak beak datpung zaih in tui sample nong pua sak bale ka ci ciang Pu Hau Mun Pau ma ma tai vingveng in, video hong zai ahihang Tuuk zong bo ngawl lai a tuiluan sia hat ngawl het hi. 

 

Dr. Dal taw zong ka son ciang, "Nangma banghang kitel sak thei ngawl het ni ziam?" hong ci a, "Kei kitel sak thei ngawl ba veang, Thuklai khuatual suak khat sang zong dei sak zaw vak ing.  Ahihang kong son teng sia ka mu le ka mu ngawl zong hausapa in 'sketch-lim' hong suai sak sitset hi," ka ci hi.  Dr. Dal in tui om teng ka cia ciang sample kong la tu a, analysis vawt tu hi hong ci hi. 

 

Hausa pa zong phone ka set a, Saya Sing zong phone ka set bul hi.  Kei hanciamna tu sia Tuinak Akluai #2 sia hi tu hi.  No tu a, ii neak sia Akluai #2 nuai a luang, pi 40 khawng pan a phuul, Akluai #1, WCC Tuinak le Zozam Tuinakte ngawm in ne vun!  Kei Tuinaak #2 sia hong awn tu nu hi kici khu hi. 

 

WCC TUI

 

WCC Program khat ahi TICPIND te in K95,605 taw 25 June 1981 lai in hong pia hi.  Thatang 450 a bo zawk ciang 15 Dec 1982 in Akluai Tui kine hi. 

 

UNICEF TUI

 

1988 June tha pan pipe kicing in hong theng a, U Than Soe lampui in pipe pe ki pan hi.  Letmat 3 pipe kizangh hi.  Kaipui zangah Reservoir (16'x16'x8' or gallon 12,000) pan in Thuklai in 1" pipe 2 taw Thuklai in ne a, Buanman in 1" le Pumva in 0.75" pipe taw ne hi.  Buanman in gallon 10,000 ta reservoir nei hi.  Sialtuzang in gallon 1000 ta tank no khat nei hi.  Pumva in tank 4 taw khol a, .gallon 4000 bang hi tu hi.  Lophei in reservoir gallon 5000 ta zangh hi. 

 

KISAPNA KEIMA MU DAAN

 

1)      Tuibeam: Buanman atu tuibeam kicing tu ka um hi.  Thuklai in tuibeampi pan a neak baan ah Hawng sim in gallon 5000 ta tuibeam khat tek nei hen a, Sialtuzang, Pumva le Lophei in gallon 5000 tek ta tuibeam hanciam kul ka sa hi. 

2)      Tuikuang or Tank: Nidang in tuikuang ii nei tek a, tuikuang leet ciang huansung ah luang lel hi.  Tuciang zong pipe taw tui ne ka sap tabang dan ma ki hi lai hi.  Innsim in tuibeam/tanky khat tek nei tu kisam ka sa hi.  Nidang in eima tuinak tek kine a, tuciang toilet kale phamaw ngawl ci bang suak thei ngawl hi.  Innsim in tuikuang, thambeal ahizong tuikhol hamtang ngawl phamaw hi.  Anei zo te in steel tank, a nei la te in fibre/plastic, thikkang dal taw kivawt tank a tatuam hanciam kul tu hi.  Inntung ah tui a khol viu vieu zo ngawlte in innzang bo tungah nga leang zong running water kinga tu hi.  Liter 1000 (gallon 222) a kicing la te in liter 2000 (gallon 444) taw kinging zo leang hoih tu hi.

3)      Water Tap –Tuimuk: Innsim in tuimuuk zak ngawl phamaw hi.  A kisam ciang hong, tuidim ciang khak cidan ii nei ba le tuidot ii belap zong ii khom ngei batu hi.

4)      Shift-Ahun Taw Tuihawm: Sun taw zan taw tui ii hong tek le bangma hun in ii kham batu hi.  Tu ii neak tui sia 3" hi a, kham laak tu hi ngawl hi.  Tedim ah 4" ziam 6" ziam 4" hi tu ka um zaw hi.  Tuimang pa Allen Marin Shaw in Tedim in tuikham ngawl a kici ciang lamdang sa ma ma hi ci hi. Ngalkapte in tui a dei po in zangh ahiciang kikham ngawl hi.  Ei zong ii dei po tek ii ngamta le tui kikhom ngei ngawl tu hi.

 

PROJECT THAK:

 

Ii tuinak vai zong telmeal om ngawl ahikom, proposal ka at pai thei bua hi.  Phone pau tu zong ol ngawl hi.  Phone kikhak ci ma, a khuala theng ci ma om ahiciang Pastor Nangno (AG) kuailaw in Thuklai hausapa le Saya Sing taw ka pau a, Tuinak Akluai II sia zangh tu khi hi ka ci hi.

 

Buanman Pumva zong phone ka set hi.  Project thak sia Tuinak pan Sang Assembly Hall sak botungah gallon 10,000 tuibeam dong pai tu hi.  Sang le Zato min taw kingen tu hi.  Proposal ka at ciangin thinlet huai ngawl het hi.  Banghangziam ci le WCC in pia a, Unicef in 3" taw pia laleau hi.  WCC sia ka lai at sungah ka hel vet bua hi.  Unicef tui sia kum 25 pha a, a sia mun zong tam, kumsim mincim a, pua tawntung lai tawntung kul hi ka ci hi.  Sanginn zong nidang in sangpatang 600 nai pan in tu 200 dong bek a om lai sia Biology kihilh ngawl ii ci hang tui om ngawl ahiciang Boarding Student om thei ngawl hi ka ci hi.

 

Zato zong tui kinga le doctor zong hong om nuam tu, sayamate a kipan, cinate dong tui om le, thinnuam tek pheang tu hi.  Sang sia te zong tui beak om ngawl na ah ngoai kho ngawl ahi na ka at hi. 

 

THUNGET PUI TA VUN!

 

Japanese Embassy: Japan te tung pan $100,000 nga thei na tu thu om hi.  Ahihang ka kizop ciang Chin State in Cidamna sang mun 6 a tu ngen zo hi hong ci hi.

 

ADRA Myanmar: Christmas mapek in proposal email taw ka puak hi.  Kumthak zawk ciang 5 January 13 ni zum hong kik ahiciang ka proposal vai nong mu nuam le keima nguak ahizong, committee taw ahizong hong pai thei tu khi hi ka ci ciang, "En man ngawl lai khi hi," hong ci thong hi.

 

Email taw sim ngawl ahile, print out in laipi ma pha leng pha vak ci in Director for Programs address in Country Director, Director for Human Resources le Director for Finance copy ka pia hi.  Country Director se Australian te hi.  ADRA in direct in hong pia zo bale, tungsia ah hong ten sak tu ahizong mundang ah fund hong zon sak na tu ahizong, CD pa in Australia Embassy ma ma ah hong nget sak na tu hi zong ka son ngei sa hi.  Thungetna ah hong phawk ta vun.  Thungetna in vanglian hi.

HEAK TU KILAWM

 

Fund ii nga le Tuinak pan Sangdong 2" pipe taw tuipiak na tu Sang ah Tuibeam khat vawt tu hi bek a, Sanghuang sung tuihawmna, Zato sung tuihawmna theam po eima siik tu ahi tu hi.  Tua bek dom ngawl in 30" thuk tuilam ii taw hamtang kul tu hi si hi.

 

NGA ZONG NGA BUA ZONG

 

Ih nga hial zong khuasim in Reservoir-tuibeam ii belap tu kong son te massa sak leang pha tu hi. Tuizak dan Tui Committee in thu hong nei ma ma kul tu hi. 

 

IH NGA BA ZEZEN LE

 

Ih nga ba zezen le zong a tungah kong son bang reservoir ahizong, a hun in tuihawm tu ahi zong, innsim tuikhol tu ahizong, tui zangh thiam leang ii khom tu hi.

 

AHIHANG THUNGET TU

 

Tui hisia nga leang, ii sang, ii zato hong khangto pheang tu a, sang le zato ette huai a sua bangma eima tuizak dan ii thiam le cidamna hong khangto tu a, ii nuntak zia cidamna na zong hong khang to tu a, thinnop lungnop zong ii mu tu hi.

 

TUIMEI BANGMA II HI LE!

 

Ii tuimei zong hong pai le mei theampo – 5 ii ngei le nga, 3 ii nei le 3, inn tung inn nuai tangsiat tana nuam ma ma bang ahihang a kisam na mun ah a taan tu za hong tang ngawl pai hi.

 

Tabang ma tui zong zangh kaleang zangh ta baleang a luan nop po a luan lai teng tui zak nuam ngei ngawl tu hi.

 

BANGBANG PO AHI ZONG:

 

Thungetna ma pawlpi sim, misim, innkuan sim in thungetna ah hong phawk ta vun!  Ih nga zawk ciang zak thiam tu kisin tu se haksa nawn ngawl tu hi. 

 

Topa in Kum 100cin poai tuikham, ankham in cidam ludam in hong muak sak tek ta hen!

 

Nong it tek uh,

 

Kenneth Htang Suanzanang

 

 

P.S. Lai-at kakawm in bosua ma ka nei a, control z met leang kinga kik ci leang a om sun zong ka bo sua tha thua a, khialna na mu uh le tel thiam ta vun. 

Posted in: Articles ( Siyin ), Thutatuam ( Siyin )