NGEINA (Culture)

(1) KHUASAM(Seasonal Festivals)
Sizang mite in kum khat sia hun (6) in khen a, tua hun zui in KHUASAM a kici khua hun poaipi (6) nei hi. Tua teng in:

1. Poai Sam (Lo thak vawt hun)
2. Sawng Sam (Thai ciin hun)
3. Aksaak Sam (Nguatui hun)
4. Khuanit Sam (Lo hunh hun)
5. Khuei Sam (An laak hun)
6. Aiciin Sam (Phalbi hun)

Hi Khuasam kici khuahun Poaipi (6) sung a lampui thiampi pa sia Khuasampa (a) Khuasam Phuisampa kina hi. Khuasam Poaipite a kivawtna thu sia, khuahun kilaih ciang a nawngkai a sia a kha hong om ngawl natu, patauh kaangmei hong om ngawl natu, natna satnate taw kipeal in ciidam thei natu, nitaan hun nitaang in, nguazuk hun in, ngua a zuk natu le thaiciin annote pha in, an hau in, nuam tak a nuntak thei natu khuahun uk maangpa tungah hesuak ngetna, pakaaina ahi hi. Khua hun tung taang pan kipan a pha a hoi teng ei kung hong thet natu, ei kungah hong pai natu kisam ci nopna hi.

Khuasam taw kisai Thuantak ah teen tek lai kivawt khawm tek hi kale mun tatuam ah ih teen zawkciang Khuasam phuisam pa omna khua pan veu kisam hi. Khuasam Phuisam Pu Za Tun hun ciang Thuantak ah kiteang tek lai a, Pu Za Tun ii tapa Pu Tawn Lam hun ciang Thuklai pan Khuasam kivawt hi. Tua zawkciang Buanman te Pu Khum Awn in Khuasam Phuisam seam a, Buanman pan Khuasam kivawt hi. A khak sang ciang Khuasam phuisamte Khuasak pan bebek ahikom Khuasak panin Khuasam poai kivawt a, Khuasam phuisam a seam khak bel Pu Hau Zam hun dong ahi hi. Khuasam taw kisai hun masa teng khangthakte in ih heak ngawl tam zo a, a tamzaw sia Khuasak khua ah Khuasam vawtdan teng a ki at ahi hi.

Khuasam Poai vawt tu ni le tan tu ni teng Khuasam phuisam pa in kamtai sawlin khuasim ah za sak hi. Thuantak pan mun tatuam ah kikhen in ten zawkciang zong, Khuasam nasep sia Sizang bup atu ahikom ngeina om bangin khuasampa tungah Khuasam law dim an piak ngei bangin Sizang kual bup in kum sim ma in pia hi.

Khuasam (a) Khuasam Phuisam seamte sia a thi dong ahibale a sep thei nawn ngawl dong ciang bek in kilaih hi. Thuantak khua pan kipan Sizang sung Khuasam (a) Khuasam Phuisam seam ngei teng a nuai a bang ahi hi.

1. Pu Mang Son (Zo-12)
2. Pu Za Tun (149-12)
3. Tawn Lam (149-13)
4. Pu Khum Awn (90-19) {Thuklai te in that}
5. Pu Neak Son (46-17) {Pu Mang Kim ii tapa}
6. Pu Kip Lam (87-18)
7. Pu Son Lam (87-19)
8. Pu Sunh Mung (97-20)
9. Pu Liim Kham (87-21)
10. Pu Zong Thuam (84-20)
11. Pu Kham Thang (84-21)
12. Pu Hau Zam (61-23)

(i) Poai Sam (Dancing Festival)
Poai Sam sia Sizang ngeina Khuasam (6) sung pan khat hi a, lothak vawt, lohal hun Phal tha (January) sungin a kivawt Khuasam poai ahi hi. Poai Sam sia Innliam zongh kici hi. A kivawt na thu sia vuipi suangvaal le kaangmei hong pian ngawl natu khuahun uk maangpa tungah pakaaina ahi hi.

Poai Sam ciangin lum le tei toai in, dial khimh in, vaphual tha le aklui meite tuanin, heisok paakte a ngui a khilin ki ak kua a, inn khat zawk inn khat ah pai in inn kiliam hi. Ahizong tua sungah vanhzakte heisok paak ngawl a dang theampo a theam vive ahi hi. Lum tu in nguada taw kivawt a, tei tu sia paakngiam baak taw kivawt hi. Dial tu in uithin kici thingkung nam khat ii a haw, aklui mei tu in baklawng, vaphual mei tu in thuambel kici thing namkhat sia a meal nimh a, hi bangin kizangh tek hi. Tua hi a, Poai Sam, Innliam ci sia, na a theam, vanhzak a theam taw lap poai khat ahi hi.

Poai Sam tu ni zingsang in khuasam phuisampa in a inn ah, zu phealbing no khat heangin a leih zawkciang nawm panin tawp a, thum vei a phii zawkciang, Khuathiam phui sam hi. Hi bang phuisamna in khua kiimdoai (mual doai, luam doai) khua sung doaite ii Sizang mite hong hesuak natu ngetna ahi hi. Khuathiam phui sam a man zawkciang zu phii kik a, khua sung khua mite zaak tu in, “Tu ni Poai Sam ni hi. Lum toai vun, tei toai vun, akngia le vaphualmeite tuan vun a, heisok paakte taw zong kizeam in hong kuan tek ta vun” ci-in au hi.

Khuasam phuisampa au zawkciang innliam tute, ih son sa ngeina om bangin kithoai in hong kuan tek a, mualtung zaangtam ci bang khawlmun nuam khat ah kikhawm hi. Tua sungah numei kihel ngawlin pate bekma innliam sung kihel thei hi. Tua a kikhopna mun ah tei taw kihol dan, lum taw kidal dan cite sinin tawm vei sung a om zawkciang poai la sa in innliam kipan hi. A poai la sia:- “Kaangte kaangte, kaangte lawliam tawng nge, vuisi aw na neam aw, kaangmei aw na neam aw” ci ahi hi.

Hi bangin poaila sa in, au in, diangin, leituan in, tawn in inn khat pan inn khat ah innliam in kivak hi. A nei zote in zutat tui taw khawng in vai dawnna nei thei hi. Innliam ciangin khuasung inn om theampo ah kipai hi. Ahizong mithi panglai neite kungah ahile inn kiliam ngawlin inn kiimkot pan kiim uum a, lum taw in kizaap hi. Innliam tu man ciang innliam theampo khuasua mual pua sia ah kipai a, innliamna a vanhzak teng le a kizepna theampo thingkung tungah baangin kinusia siat hi.

Inn tek ah ciakik tu ciang, khua sua mual ah a kithuut meiphual sia: “Kei ngal bangma baang bo, sakhi ngal bangma baang bo, theidam bang dam tong, lotang bang tang tong” ci in a kan zawkciang cia thei tek pheang hi. Innliam a, a paite a inn tek ah zongh inn omte in a kongah meikam na koi a, tua meikam a kan zawkciang a inn sungah tum pheang hi.

Hi Poai Sam zawkciang ni thum sung anhuan sim ngawl na dang seam ngawlin poai kitang hi. Poai tang ngawlin naseam leang kaangmei le vuipi suangvaal kitawk thei ci in upna kinei hi. Tua hi a, mealheak, innpaamte taw anlim thethei huanin ne khawmin nuam takin poai kitang hi. Ahizong poai tan sungin thaan ah mithi ngu thingin kipai thei a, pi le pu mealheak thi sate ngu sathau noi sak in, a sia ngawl tu in leibeal sungah koi ci bang nasepte kiseam thei hi.

Thuantak ah ten tek lai ahile Poai Sam ciangin Thuantak khua bek ah inn kiliam a, khua tatuam ah kikhen zawkciang ahile Khuasam phuisampa ii khual hil bangin Poai Sam kivawt a, khuasampa in a omna khua pan phuisamna nei in eima khua tetek ah inn kiliam hi. Poai Sam ciangin LUM kizangh hamtang ahikom Poai Sam teptee na lim sia LUM ahi hi.

(ii) Sawng Sam (Hunting Festival)
Sawng Sam sia Sizang ngeina Khuasam (6) sung pan khat hi a, thai tuu hun No tha (March) sungin a kivawt Khuasam poai ahi hi. A vawtna thu in vui le ngua hangin thai tuu sa, a po tu annote a siat ngawl natu khuahun uk maangpa ii tungah pakaaina ahi hi.

Sawng Sam ni zingsang in khuasampa in ngeina om bangin zu phii a, khuathiam phui a sam zawkciang Sawng Sam natu phui zongh sam paih hi. Tua zawkciang khua sung mite zaak tu in, “Tu ni Sawng Sam ni hi. Sawng sahawl tu in kithoai vun. Ngataam cii le thaicii om laite tuu thei tu in dai sak khol tek vun, ” ci in au hi. Hi bang a auna sia Sawng Sam ciangin sa kihawl hamtang a, ngataam cii zongh Sawng Sam zawkciang kituu pheang hamtang hi.

Sawng Sam ni pan kipan ni thum sung sawng kitang a, anhuan sim ngawl inn nasep, lo nasepte kiseam thei ngawl hi. Tua ahikom khanghaam zaw hiat teng in inn ah om a, sawng kitang in, khangnote le a tangzang zaw hiatte dui sungah sawng sahawl in kikuan hi. Tua hi a, Sawng Sam ci sia Sahawl poai ci leang zong kikhial ngawl hi.

Khuasam phuisam pa ii taangko zawkciang thau neite thau, thal neite thal, tei neite tei toai in Sawng sahawl tu in kikuan hi. Sawng sahawl na pan a kinga sate ki aih thei a, tua sa a aihte “Sawng aih” kici hi. Sawng aih nuamte in sa aih thei na kaap uh le ko inn ah hong tun tavun ci in sawng sahawlte tungah vaitha khol hi. Sa aih thei a kaap le sawng aih nuam, Sawng khaamte min taw kimualsua in a inn ah kitun hi. Sawng khaamte in sa ngaw in, zu luupin vaidawnna vawt thei hi. Sawng aihte a thi ciang Sawng la le Sawng lap a zeksa in ki om sak hi. A nuai a la sia Sawng late sung pan khat ahi hi.

* Ni khat sungah sawngpi li ka kaa, taang len el zo lo, lia len el thiam na ee.
– Sawngpi li ka kaa ni ne ka ngual lai ah a thang masa kei hi nge.

Thuantak khua ah ten tek lai in Sawng sahawl sia mun khat ah kihawl khawm tek hi. Khua tatuam ah ten zawkciang ahile khuasampa in a omna khua pan phuisam a, eima khua tetek atu sahawl in kikuan hi.

Sawng Sam ciangin sa kihawl hamtang ahikom Sawng Sam tepteena lim sia SAZALU ahi hi.

(iii) Aksaak Sam (Rain Call Festival)
Aksaak Sam sia Sizang ngeina Khuasam (6) sung pan khat hi a, thai tuu sa annote hong po zawk nguatui kisap hun Vulpi tha (May) sungin kivawt hi. A kivawtna thu in anno, ankungte atu a kisam ngua hong zuk natu khuahun uk maangpa tungah pakaaina ahi hi.

Aksaak Sam natu in ak nupa (Ak nii) kisamh a, khat tualteak na sii in, khat taangpi na sii hi. Aksaak Sam ni in khuasampa lampui a, tualteak pa le taangpi pawlkhatte Thuantak tual ah kipai hi. Biakpiak natu ak nupate ban ah khuang le sialkii zongh kikeng hi. Tual ah a pai theampo a zeksa in naanglukhu kikhu hamtang hi. Thuantak tual thet ciangin a kisamh tu naangkhau, pumthei, ak khaina nii le ngua naam cite kivawt hi.

Naangkhau ci ciang ngua a kileam khau hi. Pumthei sia ngua taw a kivawt ngeina taw kisai tumthei hi a, aw thum pha hi. Ak khaina ci ciang a laizang a mit om ngua sia naangkhau leam bangin a mit dong veu kileam hi. Tabangin leam zawkciang a han omna sang a han teng khawmin laang bangin sa to a, a puh omna sang pan a puh teng khawmin laang bangma in sa to hi. Ngua naam sia naam bangin ngua taw a kivawt hi a, letmat li bang kisau sak hi.

Tuateng a vawt man zawkciang Thuantak tual kiimkot khup tan a saangin naangkhau thung a, tua naangkhau thun sia kipal thei ngawlin, kan valian kul hi. Aksaak Sam biakpiak tu ciang khuasampa in ngua naam taw aklui sia ii a thakhui bul pan holh in, a ngua naam tungah a chi a ban le a ban ngawl en hi. Chi a baang bale pha a, chi a baang le pha ngawl hi kici hi. Tua zawkciang khuasampa in akpeang aisaan hi. Akpeang aisaan ci ciang ak ii a thakhuite nii a khut lang taw len in, a khut lang khat taw a tawlsaan a, a peang taw akmei siikin ak khawpeak sak hi. Tua ak khawpeak a thi dong en a, a pha le a pha ngawl ciamtee hi. Ak a ngoai a khiin le pha ngawl a, a ziat sang peang tungnung in a thi le zong pha ngawl ci hi.

Ak a thi zawkciangin akpum phalba nii sua a, a langkhat a lu taw kop sak hi. A lu taw a kop ak phalba lang sia akkhaina khat ii naangkhau a han taw a kisa na sang ii a sungah koi a, tual pan pusua pui in Liangtawngh paangzung tungah khai hi. Tua munah khuasampa in phuisam taw thua hi.

Tua zawkciang Thuantak tual ah cia kikin, a om lai aknu, aklui phalba lang, akkhaina le ngua naam teng Zuang ah paipui leleau hi. Zuang ci ciang tangthu nei thingkung khat ahi hi. Zuang a thet ciang khuasampa in phuisam a, aknu sia ngua naam taw holh leleau a, ngua naam tung chi a baang le a baang ngawl en in ciamtee hi. Ak phalba lang sia le aknu a nungta lai sia akkhaina sung a langah ak phalba, a langah aknu heangin Zuang tungah khai in nusia hi.

Zuang pan vawt tu teng man zawkciang Thuantak tual ah ciakik a, la sa in thei kitum hi. A man zawkciang a thei teng phalbat in, khuasampa in phuisam a, thei phalba teng tual suang tungah lawnin aisaan hi. Thei phalbate a khup in tuu maw a thal in tuu ci taw aisaan a, thusuak en hi. Tua zawkciang a thei phalba teng tualsuang nuai ah koi in nusia a, kiciasan hi. Tua aksaak Sam thabo (လကြယ္) dong khuasampa in khaungui in a zaam peuma ne ngawlin tang hi.

Thuantak pan mun tatuam ah kikhen in a kiteen tek zawkciang khuasam phuisam pa omna khua panin Sizang bup atu hi Aksaak Sam kivawt hi.

Aksaak Sam ciangin ngua zuk tu kidal kholna in Naang lukhu a zeksa in khuh kul ahikom Aksaak Sam tepteena lim sia NAANG LUKHU ahi hi.

(iv) Khuanit Sam (Trap Festival)
Khuanit Sam sia Sizang ngeina Khuasam (6) sung pan khat hi a, lo sungah ankungte khan thin zo in lo hunh tu a kisap hun Tun tha (July) sungin kivawt hi. A vawtna thu sia lo sungah a nga, a hui, a ngap toai ankungte zu le va (zunam le vacim) in a suksiat ngawl natu khuahun uk maangpa tungah pakaaina ahi hi.

Khuanit Sam tu ni in khuasampa in ngeina om bangin zu phii a, khuathiam phuisam in, khuanit samna taw kisai phui zongh sam zom hi. A man ciang khuasung khua mite zaak tek tu in, “Tu ni Khuanit Sam ni hi. Lo hung tu in kuan tek vun. Saili taw kuan vun. Kawlthaang taw kuan vun,” ci in au hi. Hi bangin a au zawkciang taangpite eima lo tetek ah pai in kawlthaang, suangpial cite le lo hunna tatuam te kivawt hi. Hi Khuanit Sam sia ni thum sung kitang a, anhuan le lo ah lo hunna tatuam (kawlthaang, suangpial) te vawt sim ngawl innna dang kiseam ngawl hi.

Khuanit Sam ciang lo hunna zak tu kawlthaang ma kisamh sak bel ahikom Khuanit Sam tepteena lim sia KAWLTHAANG ahi hi.

(v) Khuei Sam(Bee Festival)
Khuei Sam sia Sizang ngeina Khuasam (6) sung pan khat hi a, anlaak hun anthak tee hun Khuei tha (September) sungin kivawt hi. A kivawt na thu in anthak tee lungdamna le hong pai tu kum ciang an hau thei natu khuahun uk maangpa tungah pakaaina ahi hi.

Khuei Samna zak tu theikhuei kaai khat kihoai khol a, Khuei Sam tu ni khat sap in khuasam phuisampa in zu phii hi. Zu phii zawkciang tua khuei sia a ngaal ahi khueingal, ngaltun cite in sim thei nawn ngawl hi. Khuei Sam ni in khuasampa in ngeina om bangin zu phii a, khuathiamphui a sam zawkciang, Khuei Sam natu phui zongh sam zom paih a, a nitak ciang ni tum kuanin Suklumual a cina ah kilaam hi. Tua lapna sungah khuei la le lohun la teng kisa a, sialkiithei zongh kitum hi. Lap kawmin tual uapte ii hong puak zutaattui te khat zawk khat tuulin kam khakhat in kine hi. Khuei la a nuai a bang ahi hi.

* Ngaltun aw ngal the aw, nang in kumkhua na thei le,
– kong dongh hi ee, kong dongh hi ee, khuei awng nge.

A zing ciang sia khuei kila a, kilaam tu ahikom khuei laakna a zui tu tangval khangnote le a zui nuam dangte khuasampa inn ah ngiak tek hi. Zing akkhuan phit khuavak maa in khuei la tu in kikuan a, khuasung pan a ngiak khol ngawl a zui nuamte in zongh zui thei hi. Khuei laakna ah khuang, sialkii, daaktal le sialkiithei ci ngeina tumtheite kikeng hi. Khueikaai sia zingsang khuavak maa in kithiak hamtang hi. Khuavak zawkciang thiak leang ngilo a, hong de thei ci in kiciamtee hi. Khuei thia maa in khuasampa in taang the hi. Tua a the taang sia tua kum a, a kila taangthak hi hamtang tu hi. Taang the zawkciang khuei kithiak a, khuei lei a thet po ciang taangthaa kisam thei hi.

Taangthaa sam ci ciang pasal uhaam khat a nuai a bangin au hi.

“Taangthaa hong aw, taangthaa hong aw, Thawmte taangthaa hong aw, Nguite taangthaa hong aw, taang ngo thaa hong aw, ka pial sak vang lai zei, ka pial thang vang lai zei, ” ci in a au zawkciang a dang teng in “Ha ha ha ha ha, haw haw haw haw haw hawza, haw, ” ci in khuang, sialkii, daaktalte tum kawmin ngial vanuau hi.

Thei khuei sia lei a thet po ciang khat papo in pan a, a tunga bangin taangthaa kisam hi. Tua zawkciang khuei sia zawn thei tu in ciangkang sau khat tungah sawmin, a tung pan Nakhu na taw sin hi. Khuei sia mihing nii (Patang zaw hiatte nii) in zawng a, Suklumual ah laam tu in kicia pui hi. Ciana lampi ah khan (Mualsuang) phuna a kitawn, a kikantan a om le khan neite in tua sung mun ah zuluup in vai muak a, amate la phuangin laam sak thei hi. Cia kawm pai kawm, lap kawm ma in a kilawm bangin uhaam pasal khat papo in taangthaa sam thei hi.

Suklumual thet ciang khuei la le lohun la teng sa in kilaam a, sialkiithei zongh ngeina om bangin kitum hi. Tua sungah tual uapte ii a puak zutaattui le tanghuute zing an in kinei hi. Suklumual pan kipan uhaam khueiciingte le a he nuamte in khuei en thei zo hi. Tua khueikaai a et ciang khuaciingte in hong pai tu kum sung thupiang tu son khol thei hi. Khuei ente in khuasampa tungah khueikaai a kaai dan dongh in a khueikaai dan zui in, Khuasak khua a lai ah om ci bulphu in ngaisun a, khuakiim khuate ah ahizong bangbang thupiang tu ci son khol thei hi. A beamsiin a om le anhau tu, khueibu a hawm le innmong om tu, khueino a tung vazal a om le ngal, patauh kaangmei om tu, khueino a kikhai a om le ngui awk om tu cite khuei en thei khuaciingte in son khol thei, he khol thei hi.

Suklumual pan lap tu la sak tu teng man zawkciang Talaam mual kizuan a, tua mualtam ah khuei la le lohun la teng ma sa phot in ngeina om bangin sialkiithei kitum hi. Tua munah sunkhua phialin kilaam a, tanghuu le zutaattui te sunsia in kinei hi. Tua munah zongh khuei en nuamte in khuei en thei hi. Khuei ente, khuaciingte, a he nuamte khuei en khawmin kikupna, kidokna zongh nei thei uh hi.

Sunsia neak tek zawk, ni kaai zawkciang Talaam mual pan paisuk in, khuei phumna Khueiliang ah kilaam hi, Khueiliang ah lap sungin khuasampa in a ningkum a khuei phumna lei sung pan, eima cii tung a om vanh (puan, dial, samkilna, tuai at, . . . . . ) khat papo taw mihing sim atu thaa hong laak sak hi. Hi bangin thaa hong laak sak bua le ih thaa khuei taw kiphum khawm tha thei ci in upna kinei hi. Tua zawkciang ‘taangbeam’ ci in a ningkum a khuei phumna lei sia inn khat nalawngseau sung hen khat veu khuasampa tung pan phuisamna taw kila hi. Tua taangbeam a kici khuei phumna pan ciapui sia inn thet ciang beam kawm ah kikoi a, hi bang vawtna in hong pai tu kum sungin an hau thei ci upna kinei hi.

Tua teng a man zawkciang khuei phumna ah khuei kiphum a, khuasampa in phuisam hi. Khuei phum zawkciang sia taangthaa kisam thei nawn ngawl hi. Khuei phum man ciang Thuantak tual ah kituaksuk a, tual omla sa in tual ah kilaam hi. Thuantak tual ah khuasampa in zu bealmaai khat luup thei hi. Tua munah khuasampa in phuisam tu teng a man zawkciang cia la sa in cia to a, khuasampa inn ah kitum hi. Khuasampa in a kitung zo le zubealmaai khat luup thua in la dang sa in kilaam thei hi.

Hi Khuei Sam sia ni thum veu kitang hi. Khuei Sam ni le thian ni taw ciang ni nga veu bo hi. Khuei tan sungin khuasampa a kongbiang puapial thei ngawl hi. Khua sung mite zongh lo kuan nuam ngawl a, lei thaksua nuam ngawl hi.

Hi teng sia Thuantak khua pan kikhen in mun tatuam ah a kiten tek zawk, Khuasak khua pan Khuei Sam poai vawt dan ahi hi. Khuasak khua ah Khuei Sam kivawt a, Sizang khuadang panin zongh pai in ki uap tek hi.

Khuei Sam ciangin Sialkiithei tum sia a pha maw khat le Khuei Sam ciang bekin a kitum ahikom Khuei Sam tepteena lim sia SIALKII THEI ahi hi.

(vi) Aiciin Sam (Crab Festival)
Aiciin Sam sia Sizang ngeina Khuasam (6) sung pan khat hi a, Phalbi anlaak maa hun Ngam tha (November) sungin kivawt hi. A vawtna thu in phalbi sung a tung be namcimte a ngui hoi in, ngap limci toai in a pha in hong pian natu le lo lai ah a om ankung tatuamte zunam le aisa ci bang nganhingte ii a suksiat ngawl natu khuahun uk maangpa ii tungah pakaaina ahi hi.

Aiciin Sam poaipi ni maa in nitak thum (a) nitak nga (a) nitak sali sung Aivaanglaam ci in nitak simin tual ah kilaam hi. Aivaanglap ciangin tual om la a puiding in kisa hi. A nuai a la sia tual om late sung pan khat ahi hi.

* Pi aw ka nau na op sak aw, tual ah va laam ka zii tong.
– Tua ah le laam man sih vak teh, na nau kap ee hong kik aw.

Aivaanglap na sungah la phuak thak a la phuang in a kilaam ngei ngawl lai la neite in, zu beal khat luupin a la nei teng phuangin kilaam thei hi. Tua ahikom aivaanglap laphuak thak la phuang ngei ngawl laite maisot pualaakna zongh ahi hi. Tua ban ah tangvalte le ngaknute atu in, a nuam mama poai khat ahi hi. Banghangziam ci le numei le pa laam khawm in, ngualnuam in, ciammui vawt in ki om a, ki itna, mainaa na khangin a kihe thak zongh a om thei na mun ahi hi. Tua hi a, a nuai a bangin la na om hi.

* Thai nei sa te’n laamtual kiildaai bang pial a, a nei lo teng uumtui bang khawlna hi.
– A nei lo teng uumtui bang khawlna hi a, lung a dei teng ngalsial bang don na hi.

Aiciin Sam tu ni in khuasam phuisampa in a ngeina bangin zu phii a, khuathiam phui a sam zawkciang Aiciin Sam tu taangko hi. Tua ni nitak sangin khuasampa lampui in tual uapte zon aisa kop khat (aisa 4), zunam ngawm (a ko sa) khat le taangziik annoai taw Thuantak tual ah pai in, biakpiakna kinei hi. Biakpiakna ah zunam sia khen nii sua a, a lu sia tuilu pia in, a taw sia tuitaw pia a, biakpiak phuisamna nei hi. Tua zawkciang tual uapte ii luup zu bealmaai khat sia ne in nitak sung sang teng kilaam a, tual om la ma a pui dingin kisa hi.

Khuaziin khua ngial zawkciang cia la sa in, Khuasak tual ah kicia to hi. Tua sungah tawm vei lap zawkciang tual uapte ii zon aisate le annoai zahawm in kihawm a, a pai theampo a neak ngawlin pha maw hi. Tua nitak tual uapte in inn khat zu beal khat tek luup a, tuateng ne in ngaknu tangvalte le a ngualnuam nuamte zan khua dektak phial tual ah kilaam thei hi.

Aiciin Sam sung a kizangh zunam sia khuasampa in sii hi. Aisate sia tual uapte inn sim in kop khat tek veu zong a, a mealhem ngawl, a peuhee om ngawl tu a, a peangcing hi hamtang tu hi. Thuantak tual ah a kine zu bealmaai khat sia tual uap teng kipawl in sii hi. Tua ban ah Aiciin Sam sung zu neak teng le annoai te zongh tual uapte ii vaihawm veu ahi hi.

Thuantak khua pan mun tatuam ah a kiteen zawkciang Aiciin Sam sia khuasam phuisam pa omna khua ah kivawt a, khuadang pan a hi zote in aivaanglaam pan kipan pai in kihel a, tha pia in kipawm tek hi. Aiciin Sam sung atu a lamdang khat sia na dangte nii ciang kop khat ih ci hi kasap aisa ahile li ciang kop khat in kiciamtee hi.

Aiciin Sam ciangin aisa kizangh hamtang ahikom Aiciin Sam tepteena lim sia AISA ahi hi. Khuasam taw kisai a khakbel hun sung Khuasak pan veu in khuasam phuisam seam ahikom Khuasam taw kisai ngeina theampo Khuasak pan kivawt a, Khuasak in Sizang ngeina teng luasuh suak hi.

__________________________________________________
Heaktu: A tung a Khuasam thu taw kisai teng sia Khuasak pan Khuasam Phuisam a seam khak bel Pu Hau Zam tungah ahizong, tangthu ciamtee Pu K. T. Ngo Za Lian tung le Ngeina thu ciing Pa Thawng Khan Khup te tungah Rev. Vum Khat Pau in thu dokna nei a, a thu kaikhawm in a pawlcing thei bel tu le a nguicing thei bel tu in a at ahi hi.

Posted in: Articles ( Siyin ), Tangthu ( Siyin )