LAP (Folk dance)

(i) Lap ngui
Sizang ngeina sung lap a thupi bel le a bulpi sia lapngui hi a, khat ii khut khat in kileen (ahibale) khat ii liangko khat in leen (ahibale) khat le khat kikoai ngikngeak in kilaam hi. Hi bang lap ciang kal khat suan sim peang ngawm in lap le kal nii suan ciang peangngawm a lap ci in lapdan kikhen in na om sak hi. Hi lapna sungah pa, numei, khanghaam, patang, ngaknu, tangval kidoidanna om ngawlin kilaam tek thei hi.

La kiphuakte sung pan a tamzaw hi lap laam kawm in kisa thei hi. Sial la sak ciang ahile kal nii suan sim in lei 2 vei tuanh in kilaam hi. Tua ngawl lap taw kisai a nuai a bang in lap dan, lapnam pawlkhat om hi.

(ii) Palap (Men’s Dance)
Pasalte a ngui in pa lap la zeksa sa in a lap zawkciang, daak (daakbu) tumte in a la sak taw kisai daak aw sia hong tum a, a laam dang teng ding kawmin la a sak laitak, khuang tum pa, sialkii tum pa le teitoai pate thum palap ngeina kalsuan dan a om bangin lapna ahi hi. Hi lapna sungah numeite a laam in kihel thei ngawl a, pasal a laamte nung pan in a honin zui thei bek hi. Hi lap sia Sizang ngeina sa aih, ngal aih ciang le mithi vui ciangin kilaam hi.

(iii) Tawn ( Man’s Single Dance)
Daak tumte in Tawndaak kici daak aw sia a tum laitak pasal khat ama nguakin tawnin, diangin lapna ahi hi. Hi lap sia mithi vui a om ciang, mithi zan ha ni zan in, pasalte khat zawk khat kilaih in laam hi.

(iv) Thei lap
Pumthei “Thaluan” aw sia tum kawm in, thei tum taw kisi in, maipai tuak, nungkin tuakin lap ahi hi. Samang aih om ciang hi lap kilaam hi. Hi lapna sungah numei le pa kihel in laam thei hi.

Posted in: Articles ( Siyin ), Tangthu ( Siyin )