KHAMTUNG ZONGAM AH AMERICAN BAPTIST MISSION HONG THETNA

16 April 1886 ni in American Baptist Mission Union in Mr. A.E. Carson sia Kawlngam Zomi te sungah Mission seam tu in teal hi. Mr. A.E. Carson sia 14 Oct. 1886 ni in America pan Teambaw taw hong ding a, tua kum 13 Dec. 1886 ni in Yangon theng hi. Yangon hong thet zawk a ni nga ni in Basein, Ko Tha Bhyu Sagaw Kayin sang ah a seam Syama Laura Hadin taw kiteang uh hi. Amate nupa Pyi khua ah kum (2) sung bang naseam a, 1888 kum in a nasep natu phualpi ahi Thayet khua ah kikhiin in Zomi te sung Pathian nasep kipan hi.(1)

Rev. A.E. Carson in 1890 December tha sungin Pathian nasep natu ngamthak vil tu in Thayet khua pan Zongam sak sangah hong pai a, Mangkaang te ii ngal nanna mun ahi Tedim, Fort White, Falam le Hakha munte hong en hi. Sangmangpa in Hakha ngam sia Pathian nasepna ah aphabel ngam hi ci in mu hi. Banghangziam ci le Hakha ngam sia lei pha in tui zongh a kicing tu om ahikom huan vawtna, lovawt natu in kizangh thei tu kicing tu ci in um hi. (2)

1898 August tha ciang Sangmang Carson te nasepna mun phualpi laih tu laih ngawl tu ci thu nasia tak kikupna nei a, a khak bel ciang kikhiin tu sua uh hi. Sangmang Rev.A.E.Carson le a zi te 2 Feb. 1899 ni in Thayet khua pan in Hakha zuan tu in hong ding hi. Lampi ah haksatna tampi tak phul to in hong pai a, 15 March 1899 ni in amate ii tupmun ahi Hakha khua theng hi. Sangmang Carson in a masa bel in Mission atu leitangh nga thei natu vaihawm a, acre 30 bang a pha leitangh sia Rs. 50/- pia in lei hi. Tua leitangh tungah amate om natu inn le sanginn khat sa masa bel a, nasep kipan hi. (3)

Sangmang Rev. A.E. Carson in ama taw in naseam khawm tu in zato doctor khat kisamh hi ci in board ah a zaak sak ciang, board te in Dr. E.H. East pai sak tu in teal hi. Dr. E.H. East in hong pai lam in Yangon pan Insein Laithiangtho Sang ong sa Thra Shwe Zan hong ton pui a, 21 March 1902 ni in Hakha theng hi. Dr. East Khamtung Zongam a thet ciang ciidamna le pilna bulphu in na seam hi. 1900 kum ciang Sangmangte in amasa bel Mission sang Hakha ah hong in amate ii hong ton pui to ahi Kayin Sya U San Win in sangsya seam sak hi. A niina Mission sang sia 1902 kum in Tedim khua ah hong hi. A thumna Mission sang sia Tedim ngam Thaang (Fort White) nai ah hon tu sawm a, sang hon tu vai in Thra Shwe Zan 31 March 1904 ni in Hakha pan in Khuasak ah pai sak hi. (4)

Back to chapter 4

__________________________________________________
(1) ခ်င္းဧ၀ံေဂလိရာျပည့္ဓမၼသဘင္၊ ႏွစ္တစ္ရာ သာသနာလုပ္ငန္း။ စာ-11
(2) Robert G.Johnson, History of the American Baptist Chins Mission Vol. 1 (Valley Forge,Pennsylvania, USA: Published by Author, 1988) P 22
(3) ခ်င္းဧ၀ံေဂလိရာျပည့္ဓမၼသဘင္၊ ႏွစ္တစ္ရာ သာသနာလုပ္ငန္း။ စာ-၁၃-၁၄
(4) Robert G.Johnson, History of the American Baptist Chins Mission Vol. 1 . P. 58-66

Posted in: Articles ( Siyin ), Tangthu ( Siyin )