Zoinn Thu

Zomi te in nisuadeen kithupi sak aa, nisua na sang nga in, inn kisa hi. Tua in phalbi ciang in, nisa oai a nuam natu ahi hi. Tua bek dom ngol in, nisua ciang thilpho a kipho pal thei tu dei na hi. Inn sung sia hui a pailey thei na tu in khelki tam ma ki om sak hi.

Inn mai ah leitual om hi. Leitual thang sang innkaa kidaw hi. Leitual le innkaa kilaklaw ah phungdel suang kipha hi. Innkaa taw ki zom in tuangdung kidaw phei hi. Innkaa kiimkot ah taangban zawl kithung hi.

Sialkung hui ah tuikuang om hi.Tua tui sia a khualana tuinak pan tuidot taw kila hi.
Huansungah thingno nam cin ki suan aa, huan kiimkot ah paak kung te kiciing hi.
A heap in inn sia taap taw uum hi.Tua taap te sia thingngil veu hi. A dawn ah a bil kivuta thing taw kikil diimdiam hi. Nidang in, inn nuai ah vok kikhoai a, vok in eak ki ne sak hi. Inn thang sang ah akngil om a, tua munah ak te ngiak hi.

Inn sung tum na tu ah samkil om a, tasia mai sia mailim kina hi. Leangna peu ma mailim ah kitopui hi.Mailim thang sang ah dawdan om hi. Mailim sak sangah sum tawng om aa,sum tawng ah an kisu hi.Sum tawng ii tung ah thaam om aa,tasia tung ah sawmngiak te ki lum sak hi.

Inn sung anhuanna mun teng sia tap tung ki ci hi.Taptung sia tapkuang tawki uum hi. Tap tung ih thang sia pialthang kici aa, suat kidaw hi. Anhuanna mei khuk tung ah ngap ki vawt hi.

Innpi sia doi nii kisua aa, a sung sang sia sangtawng kici aa, ngeina sungah biakna vawt na in ki zangh hi. Tua mun ah miimbeam, taangbeam kikoi hi.

Nidang tanglai Zoinn te hi bang in ki sa hi.

Posted in: Articles ( Siyin )